İşğal etilgen Qırımda iyulniñ 20-nde gece Ukrayina Mudafaa quvetleriniñ Rusiye ordusını temin etüvde iştirak etken energetika obyektlerine qarşı ücümleri devam etti.
"ÇP📍KRIM" Telegram kanalı haber etkenine köre, Aluştada küçlü patlavan soñ elektrika qısmen ketti – tasdıqlanmağan malümatqa köre, nişan 110/10 kV "Aluşta" elektrik ast stantsiyası oldı. Küçlü patlavdan soñ yanğın çıqqan ve ışıq ketken.
Yalta civarında "Darsan" ast stantsiyasına qarşı ücüm aqqında da aytıldı. Hatırlatamız, oña daa evel de ücüm etilgen edi. Patlavlar Kefe, Keriç ve Balıqlava TES rayonında oldı.
"Krımskiy veter" yazğanına köre, Aluşta civarında PS "Privetnoye" 110/10 kV elektrik ast stantsiyasında yanğın qayd etildi. Onıñ malümatına köre, Üsküt (Privetnoye) köyündeki obyekt köyni, Kanaka deresi ve Qırımnıñ Cenübiy yalısındaki kurort ve turistik alanlarını elektrikanen temin ete. PS 110/10 kV "Luçistoye" rayonında da yanğın qayd etildi.
"Krımenergo" bildirgenine köre, Ğarbiy, Cenübiy ve Şarqiy Qırımda elektrik energiyası qısmen berile.
"Elektrik teminlev obyektlerine tıştan tesir etilgeni içün Ğarbiy, Cenübiy ve Şarqiy Qırımnıñ mesken yerlerinde elektrika yoq", – dep aytıla haberde.
Qayd etilgenine köre, uçucısız ücümlerinden eñ çoq zarar körgen Şimaliy, Şarqiy ve Ğarbiy energorayonlarındaki mesken yerlerde elektrik energiyası elektrik hatlarınıñ imkânlarına köre berile.
Ukrayina Silâlı quvetleriniñ Uçucısız sistemalar küçleriniñ komandanı Robert Brovdi uçucısız Yalta, Qapsihor, Üsküt, Demirci ve diger yerlerde yedi energetika tüyümi ve elektrik ast stantsiyasına ücüm etti. Onıñ aytqanına köre, umumen iyul ayında Qırımda 103 energetika obyektine ücüm etildi.