Alupkada dağlardan kelgen suv sebebinden evlerini suv basqan sakinler tahliye etile. Bu aqta Yalta Rusiye memuriyetiniñ yolbaşçı vazifelerini vaqtınca eda etken Svetlana Şevçenko bildirdi.
Onıñ aytqanına köre, Alupkada Rusiye Federatsiyası Fevqulâde vaziyetler nazirliginiñ operativ ştabı açıldı. Beş yer teşkil etildi. Qurtarıcılar qasabanı dolaşıp, vaziyetni baqa. Mütehassıslar yerlerde çalışa, suvnı almağa tırışa ve suv basqan evlerniñ sakinlerini vaqtınca açılğan noqtalarğa tahliye ete.
Qırımdaki Rusiye kütleviy haber vastalarınıñ malümatına köre, Alupkada Aqyar yolunda Hara-Bair özeni taşqanı içün mustaqil evlerni suv bastı. Qurtarıcılar yağmur kanalizatsiyalarını temizley ve evlerden birine köpür qoya. Qayd etilgenine köre, tireme divarı yıqıldı.
Aqyar yolunda "Razvilka" durağı rayonında areket qapatıldı. №1 avtobusı Bratya Govırinı soqağından kete.
Yaramay ava Yaltağa da tesir etti. Sovet meydanında yeraltı keçitini suv bastı. Şeer memuriyeti kommunal hızmetler çalışa, dep bildirdi.
Hatırlatamız, Pioner parkında bıltır tamir etilgen tireme divarı yıqıldı.
Oktâbrniñ 17-nden 20-ne qadar Ay-Petri dağı platosında sağanaqlarnıñ aylıq normasınıñ altı qatı yağdı – 509 mm. Fevqulâde vaziyet rejimi ilân etildi.