Rusiye Federatsiyası kontrolindeki Qırım Yuqarı mahkemesi “qırımlı musulmanlar davasınıñ” soqur mabüsi Aleksandr Sizikovnıñ memuriy apis qararını lâğu etip, sağlıq vaziyeti sebebinden acele azat etmege qarar berdi. Lâkin imayecisi Emil Kurbedinov onı izolâtordan alıp olamadı: Sizikovnıñ bulunğan yeri belli degil, dep haber etti advokat “Qırım birdemligi” cemaat birleşmesine.
Advokatnıñ aytqanına köre, mahkeme qararınnı alğan soñ o, Bağçasaraydaki vaqtınca tutuv izolâtorına yol aldı, amma anda müvekkili yoq edi. İmayecige berilgen malümatqa köre, Sizikovnı Aqmescitke yollağanlar, amma şeerniñ iç bir izolâtorında onı tapamadılar.
“İnsan doquz künden berli qanunsız bir şekilde apiste tutula, şimdi ise oyunlar oynaylar. Bulunğan yerini bilip olamayıp, bugün, oktâbrniñ 31-nde, işke tüşürilgen mahkeme qararınıñ yerine ketirilmesine de irişemeyim”, – dep izaatladı vaziyetni advokat Emil Kurbedinov.
Oktâbrniñ 21-nde Rusiyedeki Krasnoyarsk ülke mahkemesi Aleksandr Sizikovnıñ azat etilmesinen bağlı qararnı lâğu etip, onı Qırımdaki evinden apishanege qaytarmağa qarar çıqardı.
Oktâbrniñ 22-nde Qırımnıñ Bağçasaray rakonında aqşam Rusiye uquq qoruyıcıları “qırımlı musulmanlar davasınıñ” soqur mabüsi Aleksandr Sizikovnıñ evinde tintüv keçirip, onı alıp ketti.
Oktâbrniñ 23-nde Rusiye kontrolindeki Qırımnıñ Bağçasaray rayon mahkemesi Aleksandr Sizikovnı “poliske riayet etmeme” memuriy maddesine istinaden (Rusiye Federatsiyası Memuriy uquq bozuvları kodeksiniñ 19.3 maddesiniñ 1-inci qısmı) 10 künge apiske aldı.
Bu yıl mayısta Krasnoyarsk ülkesiniñ Minusinsk şeer mahkemesi Sizikovnı soqur olğanından azat etti, o, Qırımğa qayttı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.