Rusiye kontrolindeki Qırım yolbaşçısı Sergey Aksönov Qırım territoriyasında mototeknika areketiniñ sıñırlanuvı aqqında öz fermanına deñişmeler kirsetti. Bu aqta o İlk yaznıñ 17-nde içtimaiy ağlardaki saifelerinde bildirdi.
"Qırım Cumhuriyeti territoriyasında mototeknika areketiniñ vaqtınca sıñırlanuvı aqqında fermanğa deñişmeler kirsetildi: sıñırlavlar saat 22:00-dan saat 6:00-ğa qadar çalışacaq", — dep aytıla haberde.
Aksönov deñişmelerniñ sebebini aytmadı.
Keçende Qırımnıñ Rusiye yolbaşçısı öz fermanınen saat 20:00-den saat 06:00-ğa qadar Qırım yarımadası boyunca motosikl tehnikasınıñ areketini yasaq etti.
Aksönovnıñ aytqanına köre, bu sıñırlav "içtimaiy telükesizlik, arbiy, müim devlet ve mahsus obyektlerniñ qoruvı içün" tayin etilgen. Emirniñ yerine ketirilmesini nezaret etmek içün o Rusiye quvetçilerine emir berdi. Qanun bozuluvları içün ne cezalar belgilenecek belli degil.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.