Qırımda suv basuvından zarar körgen insanlarğa evniñ bir metr kâresi içün 6-şar biñ ruble bermege vade eteler. Bu aqta bazarertesi künü Qırımnıñ Rusiye yolbaşçısı Sergey Aksenov operativ ştabınıñ toplaşuvında bildirdi.
«Bir metr kâresi içün 6 biñ ruble aqqında aytamız. Devlet yolbaşçısınıñ qararı da bar, şunıñ içün ihtiyacı olğanlarğa ödemeler sayılğanda – ev tamiri, yoq etilgen tehnika – çoqusı insanlar bir metr içün daa 6 biñ ruble alacağını köz ögüne almaq kerek. Bu eñ yaqın vaqıtta olacaq, bütün malzemeler yollanılacaq», – dep bildire Aksenovnıñ aytqanlarını TASS.
Onıñ bildirgenine köre, şimdi Rusiye akimiyet organları olarğa kerekli tazminatlarnen bağlı berilgen malümatnı teşkere.
SEE ALSO: Qırım.Aqiqat yañartılğan haber qullanımını taqdim ete«Er şey tasdıqlansın, vesiqa şekillendirmege başlaycaqmız. Devlet yolbaşçısınıñ qarar bar, baş nazir muavininen laf ettim, aqibetlerni yoq etmek içün iyül ayında para alacaqmız. Bu 100% olacaq», – dep qoştı Qırımnıñ yolbaşçısı.
Sağanaqlardan zarar körgen Bağçasaray rayonınıñ sakinlerine 40 million rubleden çoq tazminat ödemege vade etken ediler.
Keriçniñ Rusiye yolbaşçısı Sergey Borozdin Keriçte sağanaq ve suv basuvlarından soñ tazminat aqqında ariza bergen Keriç sakinleri ödemelerini aldı, dep bildirdi.
Qırımda suv basuvlarından soñ vaqtınca qaluv noqtalarında 170-ten çoq insan qala.
Bundan evel Qırımnıñ Rusiye Fevqulâde vaziyetler nazirliginiñ idaresi 2021 senesi iyünniñ 16-ndan 18-ne qadar küçlü yağanaqlar sebebinden Yaltada ve şarqiy Qırımda 426 azbarnı, 356 evni, 18 içtimaiy ceetten müim obyektni suv bastı, dep bildirgen edi. Umumen suv basqan yerlerden 1783 kişi tahliye etildi.