Rusiye kontrolindeki Qırım yolbaşçısı Sergey Aksenov Qırım yarımadasına Şimaliy-Qırım kanalından suv bermek içün eki afta kerek, dep bildirdi.
Bu aqta o, Kalançak rayonında suv toplağan inşaatlarnı ziyaret etken soñ Telegram kanalında yazdı.
«Çezilüvi belli vaqıt alacaq problemler bar. Ukrainada kanalnıñ bir qısmı orman oldı. Temizlev işleri tahminen eki afta devam etecek. Milletçiler qurğan manianı aytsaq, onı Mudafaa nazirligi yoq eter. Bundan ğayrı, arbiyler Kalançaktan ve Ukraina içine qadar gidrotehnik inşaatlarnıñ alına qıymet kesecek», – dep yazdı Aksenov.
İşğal etilgen Qırımnıñ yolbaşçısı Sergey Aksenov Qırım Şimaliy-Qırım kanalından suv almağa azırlana, dep bildirdi.
Fevralniñ 24-nde Herson vilâyeti devlet memuriyetiniñ matbuat hızmeti Herson vilâyetindeki bir sıra meskün yerleri Rusiye ordusı tarafından zapt etildi, dep bildirdi.
Ukrainada Rusiye ücüm etken soñ arbiy vaziyet ilân etildi. Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Ücümge baqmadan, Kreml Ukrainanı işğal etmek niyetlerini red ete. Rusiye resmiy müessileri ücümnen bağlı vaziyetni pek az izaatlay, Ukraina tarafınıñ ölgen ve esir alınğan Rusiye arbiyleri aqqında malümatına cevap bermey.
Rusiye Mudafaa nazirligi snarâd ve raketalar mesken evlerge tüşkenini red ete, vatandaşlar arasında qurbanlar videosını nazirlik vekili «sahte» dep adlandırdı. Onıñ aytqanına köre, bunı «barışıqsever ealini qorquzmaq ve ğarbiy kanallarda köstermek» içün yapalar.