Rusiye FSBsi Qırımnıñ Rusiye yolbaşçısı Sergey Aksenovğa qarşı daa bir suiqastqa yol berilmedi, dep bildirdi. Onıñ maşinasını patlatmağa istegenler, dep ayta uquq qoruyıcılar. Eki ay içinde FSB Sergey Aksenovnıñ ayatını ekinci kere «qorçalay». Telüke barmı ve bu suiqast ıntıluvları qaydan kele, Qırım.Aqiqatnıñ maqalesinde tarif etemiz.
İyünniñ başında FSB Aqmescitte «Ukrayına telükesizlik hızmeti tarafından celp etilgen» ve Sergey Aksenovğa qarşı suiqast azırlağan rusiyelini tuttı, dep bildirdi. Bundan evel oña qarşı suiqastta yedi Ukrayına, Rusiye ve Beyazrusiye vatandaşı qabaatlandı, olarnı Ukrayına Mudafaa nazirliginiñ baş istihbarat idaresiniñ yolbaşçısı «Budanovnıñ casusları» dep ilân etkenler.
«Maşinanı patlatmağa planlaştırğan ediler»
FSB malümatına köre, 1988 senesi doğma Rusiye vatandaşı tutuldı. Onı Ukrayına telükesizlik hızmeti celp etti, «Ukrayınada istihbarat-patlatuv faaliyeti ögrendi» ve Sergey Aksenovnı patlatmağa planlaştırdı, dep aytıldı.
«Cumhuriyet yolbaşçısınıñ maşinasını patlatuv yolunen keçirmege planlaştırğan terakt yapmağa azırlanıp başladı. Lâkin cinayetni soñunace yapamadı, çünki patlayıcını gizli yerinden çıqarğanda tutuldı», – dep bildirdi FSB.
FSB işareti mahsus hızmetniñ hadimi urbasında. Nümüneviy fotoresim
Tutulğanğa qarşı Rusiye Federatsiyası Ceza kodeksiniñ 30-ıncı maddesiniñ 1-inci qısmı, 205-inci maddesiniñ 1-inci qısmına istinaden (terror ücümini yapuv ıntıluvı) ve Rusiye Federatsiyası Ceza kodeksiniñ 222.1 maddesiniñ 1-inci qısmına istinaden (patlayıcı maddelerni ve patlayıcı cihazlarnı qanunsız aluv, satuv, berüv) cinayet alâmetlerine köre cinaiy dava açıldı.
Mahsus hızmetler şübheli tutulğan videonı derc etti, adı aytılmay, sorğunıñ bir qısmı bar. Tutulğan kişi qabaatını tanıy ve «mayınnı arabağa qoyıp, Aksenovnıñ arabasını patlatmaq içün onı Sevastopolskaya soqağında qaldıracaq edi», dep ayta. Ukrayına telükesizlik hızmeti bunı açıq şekilde izaatlamadı.
Mercedes-Benz S 600. Nümüneviy fotoresim
Aksenov FSBge «yahşı iş» içün teşekkürler bildirdi. «Menim içün hulâsa bir: duşmanlarğa tesir ceetinden er şeyni doğru yapam, doğru yoldam. Bu yolnen ketmege devam etecem. Duşmanlar menim kibilernen başqa türlü mesele çezim olamaycaqlarını añlay. Menim ğayelerim bar. Şunıñ içün qabul etem. Ğalebege qadar areket etecekmiz», – dedi o.
Aksenov «ingliz patlayıcısından» nasıl qurtarıldı
Sergey Aksenov ilk sefer suiqasttan «qurtulmay». Mayısnıñ başında FSB Qırımda Rusiye yolbaşçısı, Qırımnıñ Rusiye parlamentiniñ spikeri Vladimir Konstantin ve Yalta Rusiye memuriyetiniñ yolbaşçısı Yanina Pavlenkoğa qarşı diversiya yapmağa planlaştırğan «Ukrayına arbiy istihbaratınıñ casusları» tutuldı, dep bildirdi. Terakt azırlaması, mahsus vastalarnıñ qullanuvı ile memurlarnı taqip etüv ve silâ satın aluv şübhesinen Rusiye ve Ukrayına vatandaşları Viktor Podvalnıy, Aleksandr Litvinenko, Sergey Krivoşein, Konstantin Yevmenenko, İgor Zorin, Sergey Voynarovskiy ve Bulğaristar vatandaşı Petranov (adı aytılmadı – QA) tutulğan edi.
FSB dairege sürip kire. Nümüneviy fotoresim
FSB malümatına köre, suiqastnı kerçekleştirecek insanlar Büyük Britaniyada işlep çıqarılğan «elnen yapılğan patlayıcı cihazlar» yardımınen planlarını ömürge keçirmege istegen ekenler. Patlayıcı «Ukrayına mahsus hızmetleriniñ vekilleri tarafından elektroocaqlar şeklinde Bulğaristandan Türkiye ve Gürcistandan Rusiyege ketirilgen eken». Ukrayına istihbaratı FSBniñ aytqanlarını «informatsion-psihologik mahsus operatsiya» dep adlandırdı. Amma Qırım memurları FSBge qurtaruv içün teşekkür bildirdi.
Aksenov qaravul sayısını arttırmağa niyeti yoq, dep ayttı. Keçken yılları onıñ yanında eñ az 4-5 qaravul bar edi. Körgenler soray edi: onı telükeden qoruylarmı, yoqsa qaçmasın dep baqalarmı?
«Aksenovnı patlatmaq içün çoq patlayıcı kerek»
Rusiyeniñ Ukrayınağa qarşı büyük istilâsı vaqtında Sergey Aksenov «biriniñ nişanı ola bile», dep tüşüne Oleksandr Zagoruyko – bir vaqıtları Ukrayınanıñ bir qaç prezidentiniñ qaravul reberlerinden biri olğan ve Ukrayına Devlet qaravulı idaresi yolbaşçılarınıñ sabıq mesleatçısı. Lâkin, onıñ fikirince, FSB aydınlatqan eki stsenariy de kerçek telükeni köstermey.
«Bes-belli, Aksenov Qırımda devlet qaravulı altında buluna. Onıñ maşinası protokolğa köre em garajda, em soqaqta gece-kündüz nezaret altında qalmalı. Böyle vaziyette maşinada treker qoymaq imkânsız ola (Sergey Aksenov, Vladimir Konstantinov ve Yanina Pavlenkoğa qarşı suiqastta şübhelengenlerniñ, FSB malümatına köre, memurlarnı taqip etken trekerleri tapılğan edi – QA). Olarnı tehnik baquv ya da maşina yuvulğanda körer ediler», – dep ayttı Oleksandr ZağoruykoQırım.Aqiqatqa.
Onıñ aytqanına köre, iyün ayında FSB tarafından tutulğan ve Aksenovnıñ arabasını patlatmağa istegen dep tanıtılğan rusiyeli versiyasında ayat telükesi şübheli edi.
Federal qaravul hızmeti qaravulı. Nümüneviy fotoresim
«Aksenov zırhlı maşinanen yüre, dep tüşünem. Onı patlatmaq içün bayağı patlayıcı kerek. Bir kişi onı ketirip, yanından Aksenov keçken maşina tübüne yerleştirip olamaz edi, FSB aytqanı kibi. Bunı tek kamikadze yapıp olur edi, o, Aksenovnıñ maşinasına patlayıcınen kirse, özü de ölmege mecbur olur edi. Diger taraftan, Rusiye mahsus hızmetleri özleri de böyle operatsiyanı kerçekleştire bile», – dep ayta Oleksandr Zağoruyko.
Sergey Aksenovnıñ suiqasttan qorqmay degen lafları «etraftakilerine ve Moskva reberlerine itibarını isbatlav» ıntıluvı ola bile, dep ayta Zağoruyko. Amma kerçekten telüke olsa, böyle yanaşuvnıñ sebebi yoq.
«Memurğa qarşı kerçekten suiqast telükesi olsa, telükesizlik sisteması quvetleştirile, qoşma küç ve vastalar celp etile. Memur bu vaziyette qorqunı açıq-açıq köstermemeli, ebet. Amma qorqusız olğanınen maqtanmaq da kerekmey», – dedi o.
«Aksenov – FSBnen Kreml qubbeleriniñ cenkinde»
Refat Çubarov
Sergey Aksenovğa qarşı suiqast azırlav haberlerini Qırımtatar Milliy Meclisiniñ reisi Refat Çubarov «Rusiye mahsus hızmetleriniñ kirli provokatsiyası» dep saya. O, «gizli yer» ve patlayıcı madde stsenariyinen Rusiye mahsus hızmetleri sabıq siyasiy mabüs Edem Bekirovnı da taqip etken edi, dep hatırlattı.
«Provokatsiyanıñ kerçek sebebi şu ki, Aksenov ve FSB reberleri ucuz, amma «sert» usulnen Aksenov ve Prigojin-Putin çatışmasında beklep oturğanlarını Kreml ögünde aqlamağa tırışa», – dep bildire Meclis reisi.
Yevgeniya Gorünova
Qırımlı siyasetşınas Yevgeniya Gorünova Sergey Aksenovğa ücüm etilecegine «iç inanmay». FSBniñ oña qarşı teraktqa mania olmasını «kütleviy haber vastaları içün bir resim» dep adlandıra.
«Aksenovğa qarşı suiqast bir oyun ve Rusiye ordusınen degil, FSB ile olğanını kösterüv ıntıluvı ola, dep tüşünem. Añlaymız ki, Rusiyede Kreml qubbeleri, arbiyler ve FSB arasında cenk kete. Aksenov Şoygunen (Rusiye mudafaa naziri – QA) olmağanını olmağanını, FSB tarafından qoltutulğanını köstere. Kreml qubbelerine bir tenbi bar. Em de reytingni kötermek kerek, ebet», – dedi siyasetşınas Azatlıq Radiosınıñ yayınında.
FSBniñ Ukrayına akimiyeti Sergey Aksenovğa qarşı ücüm azılağanına dair aytqanları şübhe doğura, dep tüşüne Yevgeniya Görünova, çünki Ukrayına akimiyeti «Aksenovnı öldürmek degil, mahkeme etmek istey».
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.