Qırımnıñ Rusiye yolbaşçısı Sergey Aksenov Suriye prezidenti Başar Asad ile körüşe. Bu aqta Aksenovnıñ matbuat hızmeti bildire.
Asad ve Aksenovdan ğayrı körüşüvde Qırımdaki Rusiye akimiyetiniñ vekilleri ve Suriye akimiyeti iştirak ete. Muzakerelerniñ tafsilâtları şimdilik yoq.
Aksenov, Asadnı işğal etilgen yarımadağa 2019 senesi aprel ayında keçirilecek V Yalta iqtisadiyat forumına davet etmege istegenini aytqan edi.
Aksenov ve Asadnıñ körüşüvi
Oktâbrniñ 15-nde Qırımdaki Rusiye akimiyetiniñ temsilcileri Suriyege kelip çıqtı. Olarnıñ bildirgenine köre, Qırım ve Latakiya vilâyeti arasında ticariy-iqtisadiy, ilmiy-tehnik ve gumanitar işbirligi añlaşmasını imzalamağa planlaştırıla.
Aksenov, Qırım akimiyeti Qırım müessiseleriniñ mahsulatını Suriyege taşımağa planlaştıra, dep bildirdi. Laf elektronika ve un aqqında kete.
Qırımnıñ Rusiye medeniyet naziri Arina Novoselskaya ve qırımlı senator Olga Kovitidi Asad ile körüşüvde
Bundan ğayrı, Qırımnıñ Rusiye akimiyeti Suriye ve Qırım arasında uçaq seferleri açıla bile, dep bildirdi.
Aksenov ve Aszdnıñ körüşüvi
Ukraina Tış işler nazirligi Qırımnıñ Rusiye akimiyeti vekilleriniñ Suriye ziyaretini daa izaatlamadı.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.