Ekinci Aqmescit "Qırım musulmanları davası"nıñ mabüsi Tofik Abdulgaziyev Rusiye koloniyasından azat etilgen soñ sağlıq alı sebebinden tedaviylev problemleri ile qarşılaştı. Bu aqta onıñ qadını Aliye Kurtametova bildirdi.
Onıñ aytqanına köre, evge qaytqanınıñ quvançı pek azdır. Kelgen soñ ertesi künü qoranta hastahanelerge muracaat etip, Tofikni qaydğa almaqnı rica etti.
Tış körünişi bir qarar olpanına baqmadan, aqaynıñ alı ağır: devamlı baş aylanuvı bar, közleri qaralaşmaqta, nefes aluvı qıyın. Gece namazı vaqtında o, esini coyğan.
Kurtamentovanıñ aytqanına köre, tez yardım feldşeri, tibbiy raportnı baqqan soñ, STB-3 apishane hastahanesinde berilgen insulinniñ müddeti bitkenini qayd etti. Erkek bundan habersiz olıp, onı qullanmağa devam ete edi. Kerekli insulinni almaq ie şimdiki vaqıtta bürokratik protseduralar sebebinden qıyın.
"Men onıñ qattılığına sadece ayrette qaldım. O, öz vaziyetine baqmadan, musafirlerni tebessümnen qarşılay ve er bir musafirge bütün diqqatını bağışlamaq içün er türlü ğayret köstere. Men oña daima bu rejim şimdi onıñ içün degil, oña daa çoq raatlıq kerek olğanını aytsam da. "Yarın ölsem bile, mümkün olğanı qadar olarnen olacağım" dey", — dep Aliye Kurtametova aqayınıñ sözlerini ketire.
Hatırlatamız, Tofik Abdulgaziyev 2019 senesi Sabannıñ 27-nde işğal etilgen Qırımda Rusiye Federatsiyasında yasaqlanğan, amma dünyanıñ diger memleketlerinde izin berilgen "Hizb ut-Tahrir" diniy teşkilâtında iştirak etkeninde qabaatlanıp tutuldı.
2022 senesi Quralayda Rostov-na-Donu Cenübiy okrugınıñ arbiy mahkemesi Abdulgaziyevni 12 yıl sert rejimli koloniyada qalmasına üküm etti. İlk beş yılını apishanede keçirmek kerek. Bir yıl soñra, 2023 senesi Quralayda, Vlasiha şeerindeki İstinaf arbiy mahkemesi birinci instantsiya mahkemesiniñ qararını deñiştirmedi.
2023 senesi Oraqta Tofik Abdulgaziyev Rusiye Federatsiyasınıñ Çelâbinsk vilâyetindeki Verhneuralsk apishanesine etap etildi.