Ukraina mahkemesinde "Qırım dezertirleri davası" boyunca imaye etken advokat Valentin Rıbin, Volodımır Zelenskıy rusiyelilerniñ mefası aqqında ariza imzalamağance, Rusiye ve Ukraina arasında esirler almaşuvı olmaycaq, dep ayta.
Bunı o, Rusiye ve Ukraina matbuatına aytıp berdi.
"Şimdi bir pauza peyda oldı, epimiz bu arizanı bekleymiz", – dedi Rıbin UNN Ukraina agentligine.
Onıñ aytqanına köre, "mefa protsedurasından keçecek şahıslar bar, çünki olarnıñ davaları boyunca milliy mahkemeler ükümleri endi amelge keçirildi"..
"Yuridik ceetten başqa türlü azat olmağa mümkün degil. Onıñ içün biz, bu şahıslarnımefa etecek ve almaşuv imkânını berecek arizanı bekleymiz", - qoştı Rıbin.
Aynı böyle haberni Rıbin TASS Rusiye agentligine de bildirdi.
Qırım.Aqiqat, bu malümatnıñ tasdıqını Rıbinniñ özünden alacaq edi, amma advokat şimdilik telefonğa cevap bermey.
Daa evel, Ukraina ve Rusiye "33 33-ke" almaşuvı aqqında añlaşqanı bildirile edi.