Advokat Emil Kurbedinov Rusiye FSB-sine onıñ matbuat hızmeti, Cemaat bağları merkeziniñ (CİM) areketlerine qarşı şikâyet yolladı, çünki Qırımlı Esma Nimetulayeva, Elviza Aliyeva, Nasıba Saidova ve Fevziye Osmanovanı "Hizb ut-Tahrir" teşkilâtına alâqası bar olğanında şübheli sayıp tutqan künü Rusiye quvetçileri qadınlarnı "halqara terror teşkilâtınıñ" iştirakçileri dep adlandırdı ve mahkeme davası aqqında bildirdi. Bu aqta "Qırım birdemligi" cemaat teşkilâtı advokatqa atıf etip yaza.
İmayeciniñ aytqanına köre,Cemaat bağları merkeziniñ qaydındaki ifadeler oquyıcılarda bu qadınlarnıñ Rusiye Federatsiyasınıñ qanunlarına köre terroristik sayılğan teşkilâtqa ait olğanları ve terroristik faaliyetke alâqası bar olğanları aqqında fikirni şekillendire. Rusiye Federatsiyasınıñ 2006 senesi qabul etilgen "Terrorizmge qarşılıq kösterüv aqqında" federal qanunında terroristik faaliyet ve teraktlar — bu tek cemiyet ve devletke qarşı yapılğan zorbalıq areketler (patlavlar, ateşke berüv, reine, bina ve inşaatlarnı zapt etüv ve ilâhre) olğanı aytıla, dep qayd etti Kurbedinov.
Emil Kürbedinov FSB-den Esma Nimetullayeva ile bağlı "yayınlanğan malümatınıñ doğrulığını" teşkermesini talap etti. Bundan da ğayrı, o, FSB-den "Hizb ut-Tahrir" Rusiye Federatsiyasınıñ qanunlarına köre terroristik olaraq tanılmağanını ve apiske alınğan dört qadınnıñ terroristik teşkilât ve faaliyetnen alâqası bar olğanını red etmesini talap etti.
Orta küz ayınıñ 15-nde Rusiye quvetçileri Qırımda dört qırımtatar qadınını tutıp, olarnı Rusiye Ceza kodeksiniñ 205.5 maddesine istinaden (terror teşkilâtınıñ faaliyetinde iştirak etüv) "Hizb ut-Tahrir" davası boyunca qabaatladı.
Tutulğanlar arasında Esma Nimetulayeva, beş balanıñ anası ve siyasiy mabüsniñ apayı; Nasiba Saidova, bala bağçasında çalışqan student; Elviza Aliyeva ve Fevziye Osmanova.
Orta küz ayınıñ 16-nda Aqmescitteki Rusiye kontrolindeki Kiyev rayon mahkemesi dört kişini eki ayğa SİZO-ğa yolladı.