Qarasuvbazarda oktâbrniñ 18-nde qırımtatar cemaat-siyaset erbabı Abdureşid Mediyevniñ abidesi açıldı. Bu aqta Qırım.Aqiqat mühbiri haber ete.
Onıñ malümatına köre, abide açılışınıñ teşebbüsçileri qırımtatar cemaatçıları ola.
«Abdureşid Mediyevniñ abidesi tiklendi, nevbetteki adım Qarasuvbazar soqaqlarından birine meşur qırımtatar erbabı adınıñ berilmesi olmalı», – dep bildirdi tedbirde çıqışta bulunğan abide tiklenüviniñ teşkilâtçılarından biri, qırımtatar cemaatçısı Memet Kemaletdinov.
Qarasuvbazarda Abdureşit Medievniñ abide açılışı
Abdureşid Mediyev 1880 senesi fevral ayında Tavriya guberniyasınıñ Perekop qazasınıñ Qaraca köyünde dünyağa keldi. Ananeviy qırımtatar mektebinde oqudı, soñra Aqmescit tatar oca mektebini bitirdi. Ermeni Bazarda qırımtatarlar içün mektepte rus tili ocası olıp çalıştı.
1907 senesi fevralniñ soñunda Mediyev II çağırılış Rusiye imperiyasınıñ Devlet Dumasınıñ deputatı olaraq saylandı. Tavriya guberniyasınıñ şimaliy qazalarınıñ ukrain ve rus saylayıcıları ve Halq serbestligi firqasınıñ siyasiy küçü oña ğalebe ketirdi.
Abdureşid Mediyev qırımtatar neşirleriniñ naşiri ve muarriri olaraq da belli. Jurnalistika ayatınıñ müim bir yerini alğan edi.
1907 senesi noyabr ayında «Vetan Hadimi» gazetası qapatılğan soñ «Musulmannıñ sesi» rus tilli neşirini çıqardı. Maqaleleri Baqunıñ «Kaspiy» gazetasında, Parijniñ «Musulman» gazetasında ve Rusiyeniñ liberal matbuatı saifelerinde derc etilgen edi.
Mediyev 1912 senesi mayıs ayında 32 yaşında vefat etti.