Amerika Birleşken Devletleri ve Avropa Birligi Qırım yalısında ukrainalı gemi ve askerlerniñ zapt etilüvi sebebinden Rusiyege qarşı yañı sanktsiyalarnı azırlaylar. Bu aqta Sky News ve Financial Times Amerika kütleviy haber vastaları öz menbalarına esaslanıp bildire.
Sky News malümatına köre, Büyük Britaniya ve bir sıra Avropa memleketi Rusiyege qarşı yañı tedbirlerniñ yaqın aftalarda ilân etilmesini isteyler. Avropa İç işler nazirlikleriniñ yolbaşçıları bu mevzunı bazarertesi künü, fevralniñ 18-nde, muzakere etecek.
Financial Times yazğanına köre, sanktsiyalar ukrainalı gemilerniñ zapt etilüvinde iştirak etken insanlar ve şirketlerge qarşı kirsetilecek.
Bu haberler peyda olğan soñ Moskva birjasında ruble ucuzlaşıp, 10 daqqa içinde dollarğa nisbeten 46 kapik ve euroğa nisbeten 66 kapik coydı, dep bildire «Vedomosti» Rusiye neşiri.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.