«Er angi muzakere – Ukrayınanıñ işi. Endi aytqanımız kibi, Ukrayınanen bağlı iç bir şey Ukrayınasız keçirilmemeli. Barışıq formulasınıñ qurulışı tışında Ukrayınanen er angi muzakere laflarından haberimiz yoq», – dedi o.
Devlet departamenti qayd etkenine köre, deñişmegen bir şey bar, Kreml muzakere ya da cenk bitmesini istemey. «Biz ise Ukrayına ortaqlarımızğa qoltutamız», – dedi Devlet departamentiniñ vekili.
Noyabrniñ 4-nde NBC News Amerika telekanalı eki ABD memurınıñ – biri sabıq ve biri şimdiki – malümatına esaslanıp, ABD ve Avropa Birliginiñ temsilcileri Ukrayınanen Rusiye ile cenk toqtatıluvına dair barışıq muzakerelerini laf etip başladı, dep bildirdi.
Memurlar bildirgenine köre, NATO Ukrayınağa Rusiyeni yañı istilâdan uzaq tutacaq telükesizlik kefaletlerini bermege azır.
Telekanal menbaları qayd etkenine köre, muzakereler ABD ve Avropa memleketleri cenk çıqmazğa kirdi ve Ukrayınağa yardım etmege devam etmek içün imkânları olmağanından başlandı.
ABD vekilleri Ukrayınanı muzakerege çağırğanını ve bunı laf etkenini resmiy şekilde inkâr ete.
Ukrayına prezidenti Volodımır Zelenskıy uruş meydanındaki vaziyet zor qala, amma cenk «çıqmaz alda» olğanına inanmay, dep qayd etti. Onıñ bildirgenine köre, Rusiye Ukrayına topraqlarından ketkenine qadar Ukrayına Rusiyenen bir muzakere başlatmaycaq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.