ABD prezidenti Joseph Biden Varşavada Ukrayina Tış işler naziri Dmıtro Kuleba ve Ukrayina Mudafaa naziri Oleksiy Reznikov ile körüşti. Bunı Bloomberg agentligi haber ete.
Körüşüvde ABD devlet kâtibi Antony Blinken ve Pentagon başı Lloyd Austin iştirak etti. Bu, Amerkia ve Ukrayina taraflarınıñ Rusiyeniñ Ukrayinağa istilâsı başlanğanından berli böyle seviyede ilk körüşüvidir.
Oleksiy Reznikov Twitterde körüşüv vaqtında aqımdaki meseleler ve Ukrayina ve ABD arasında siyasiy ve mudafaa yönelişlerinde işbirlik muzakere etilgeni aqqında yazdı.
Biraz soñra Biden çıqışta bulunıp, ABD ve ittifaqdaşlarnıñ Ukrayinağa yardım etmek içün çareleri aqqında aytıp berecek.
Poloniyağa Biden Brükselden keldi. Anda o NATO ve G7 sammitlerinde iştirak etti. Bundan ğayrı o AB reberligi ile körüşip, laf etti. ABD prezidenti ve Avropa komissiyası reisi Ursula von der Leyen Avropanıñ Rusiye energiya menbalarına tabiligini eksiltmek içün AB-ne ilâve şingen gaz teslimatı ile bağlı yañı añlaşma aqqında keliştiler.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: d3hzcgsd893cx5.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.