Amerika Birleşken Devletlerinde COVID-19 koronavirus yuqunçına oğrağanlarnıñ sayısı 400 biñ oldı. Bu aqta Johns Hopkins universiteti bildire, dep haber ete Azatlıq Radiosı.
ABDde hastalarnıñ sayısı diger memleketlerdeki hasta sayısından qat-qat büyüktir. Bu raqamğa köre İspaniya ekinci yerde – 142 biñge yaqın hastası bar, İtaliyada – 135,5 biñden çoq, Frenkistanda – 110 biñden çoq, Almaniyada – aman-aman 108 biñ.
ABDde COVID-19 hastalığından vefat etkenlerniñ sayısı 13 biñ oldı. Bu raqam İtaliyadan az ola (anda 17 biñden çoq vefat qayd etildi), amma İspaniyadaki ölüm sayısına yaqınlaşa, anda 14 biñden çoq kişi can berdi. Tek soñki künde Birleşken Devletlerde eki biñden çoq insan koronavirustan vefat etti.
Your browser doesn’t support HTML5
«Boğazıñızda cam parçası qaldı kibi olasıñız» – koronavirusqa oğrağan ingliz qadın (video)
Dünyada aman-aman 1 mln 432 biñ COVID-19 hastası bar. 82 biñden çoq insan vefat etti, 300 biñden çoq kişi tüzeldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.