Ukrayına prezidenti Volodımır Zelenskıy işğal etilgen topraqlarda yaşağan ukrayınalılarnı Rusiye ordusınıñ arbiy obyektlerine yaqın olmamağa çağırdı.
«Er kün ve gece işğalciler vaqtınca zapt etken topraqlarda patlavlar aqqında haber alamız… İşğal etilgen topraqlarda patlavlarnıñ sebebi farqlı ola bile, «pek farqlı ola bile, işğalciler aytqanı kibi, «golovotâpstvo». Amma er biriniñ manası bir: işğalcilerniñ logistikasını, silâsını, arbiy ve diger tehnikasını, komandanlıq noqtalarını yoq etüv, insanlarımıznıñ ayatını qurtaruv. İşğalcilerniñ yamanlıq yapmağa ve ukrayınalılarnı öldürmege imkânı ne qadar az olsa, toprağımıznı azat etip, bu cenkni o qadar tez toqtatıp olurmız. Bu künleri Qırımdan Rusiyege ketmek içün köpürde olğan nevbet terrorist devletniñ vatandaş ekseriyeti Qırım olar içün yer olmağanını añlamasa da, is ete», – dep qoştı Ukrayına prezidenti.
O, «işğalcilerniñ ordusını zayıflatmağa» yardım etken Ukrayına Silâlı quvetlerine, istihbaratına, mahsus hızmetlerge yardım etken bütün ukrayınalılarğa teşekkür bildirdi.
«İşğalcilerni Ukrayınadan quvmaq içün Rusiyeniñ cenkleşmesi er kün daa zor olmalı – bu bizim birinci arbiy-siyasiy vazifemiz», – dedi Zelenskıy.
Avgustnıñ 16-nda saba işğal etilgen Qırımnıñ Canköy rayonında patlavlar oldı. Silâ anbarları, transformator alt stantsiyasında patlavlar ve demir yolnıñ zarar körgeni aqqında haber etildi.
Rusiye akimiyeti Canköy rayonınıñ Qalay köyünden 3 biñden çoq sakin tahliye etildi, dep bildirdi.
Daa evel berilgen malümatqa köre, Rusiye Mudafaa nazirligi Qırımnıñ şimalinde olğanlarnı «diversiya» dep adlandırdı. Qırımda cinaiy iş açıldı. Şübheli ya da tutulğanlar aqqında malümat berilmey.
Qırımnıñ Rusiye yolbaşçısınıñ mesleatçısı Oleg Krüçkov Qırımdaki patlavlarnı «terakt» dep adlandırdı.
The New York Times neşri yüksek rutbeli Ukrayına memurına atfı etip, işğal etilgen Qırımnıñ Canköy civarındaki patlavlarğa «elit ukrayin bölüginiñ» alâqası bar, dep bildirdi. Neşirniñ qayd etkenine köre, memur adı gizli olğanını istegen.
Avgustnıñ 9-nda Saq rayonınıñ Novofedirivka qasabasınıñ arbiy uçaq alanında patlavlar oldı. Rusiye akimiyeti «yaqın evlerden» tahminen 30 kişi tahliye etildi, dep bildirdi. 60-tan çoq mesken ev zarar kördi.
Rusiye Mudafaa nazirligi Novofedirivkada (Saq) arbiy uçaq alanında olğan patlavlarnıñ sebebi «bir qaç aviatsiya silâsınıñ detonatsiyası» oldı, dep bildire. «İnterfaks» Rusiye neşiri Rusiye Federatsiyasınıñ Mudafaa nazirligindeki menbasına esaslanıp haber etkenine köre, müessise patlavlarnıñ esas sebebi olaraq «yanğın telükesizligi qaideleriniñ bozuluvını» saya.
Ukrayına akimiyeti ve arbiyleri Rusiye işğal etken Qırımdaki patlavlardan mesüliyetini tanımadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.