Ukrayına prezidenti Volodımır Zelenskıy Ğarpnı Rusiye vatandaşlarınıñ kirişini yasaqlamasına çağırdı. Zelenskıy avgustnıñ 8-nde The Washington Post içün bergen intervyüsında bu Rusiyege Ukrayınanıñ yañı topraqlarını işğal etecek usullarından biri ola bile, dep ayttı.
Onıñ aytqanına köre, «sıñırlarnıñ qapatıluvı eñ müim sanktsiya ola – çünki rusiyeliler başqasınıñ toprağını ala». Rusiyeliler «felsefelerini deñiştirgenine qadar öz dünyasında yaşamalı», dep qoştı Ukrayına prezidenti.
Onıñ qayd etkenine köre, böyle sanktsiyalar prezident Vladimir Putinniñ ükümetinen ve Ukrayınağa ücüm etmek qararınen razı olmayıp, Rusiyeni terk etkenlerge de tesir etmeli.
«Ruslar nasıl olsa olsun… Rusiyege ketsinler. O vaqıt añlarlar. Aytacaqlar: «Bu [cenkniñ] siznen alâqası yoq. Bütün eali mesüliyetli olamaz, doğrumı? Ola bile? Eali bu akimiyetni sayladı, onen küreşmey, davalaşmay, qıçırmay», – dedi Zelenskıy.
Onıñ aytqanına köre, bütün rusiyelilerniñ kiriş yasağı – «Putinge tesir etecek yekâne usul».
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.