Çetel devletleriniñ ükümetleri ve halqara teşkilâtlar işğal etilgen Qırımda advokatlarğa qarşı yapılğan repressiyalarnı birden takbih etip, alâqası olğanlarğa qarşı sanktsiya kirsetmeli. Bu aqta «KrımSOS» ve diger aq qorçalayıcı teşkilâtlarnıñ beyanatında avgustnıñ 5-nde aytıldı.
«Advokatlarnıñ zenaat faaliyeti sebebinden qorquzuluvları, basqı ve taqip etilüvileri qabul etilmeycek bir şey. Bu halqara standartlarğa ve uquqiy zenaat vekilleri içün kefil belgilegen qanunlarğa zıt kele. Advokatlarnı tutuv BM cinayet ögüni aluv VIII Kongressinen qabul etilgen «Advokatlarnıñ rolü aqqında esas nizamnamelerni» boza, imayecilerniñ vekâletlerini maniasız yerine ketirüv imkânı kefil etilmeli (qorquzuv, kirişüv ve zenaat faaliyeti içün cezalav olmayıp)», – dep bildirdi «KrımSOS» idare yolbaşçısı Denis Savçenko.
Ukrayına aq qorçalayıcıları çetel devletleriniñ ükümetlerini ve halqara teşkilâtlarnı, hususan «Qırım platformasınıñ» iştirakçilerine açıq mektüp derc etti:
- İşğal etilgen Qırımda advokatlarğa qarşı repressiyalarnen bağlı qararlı bir narazılıq bildirmek;
- İşğal etilgen Qırımda insan aqlarınıñ bozuluvına alâqası olğan şahıslarğa, hususan FSB hadimleri, qadı, tahqiqatçı, penitentsiar müessiselerniñ yolbaşçılarına qarşı sanktsiyalar kirsetmek;
- Qırımda siyasiy repressiyalarnıñ qurbanları ve qorantalarına qoltutmaq;
- İnsan aqlarınıñ bozuluvı, arbiy cinayet ve insaniyetlikke qarşı cinayetlerni qayd etip, olarnı Ukrayınadaki insan aqları vaziyetine dair esabatlarğa kirsetmek;
- Ukrayına ükümetine işğal etilgen Qırımda arbiy cinayetler, insaniyetlikke qarşı cinayetler ve insan aqlarınıñ bozuluvını tahqiq etmekte yardım etmek;
- Qırım ve esas Ukrayınada yañı deşetlerge imkân bermemek ve Ukrayınıñ topraqlarını işğalden azat etüvni tezleştirmek içün Rusiye Federatsiyasına diplomatik, sanktsion ve diger basqılarnı quvetleştirmek.
Çeçenistan Cumhuriyetiniñ Advokatlar palatası üç qırımlı advokat Lilâ Gemeci, Rustem Kâmilev ve Nazim Şeyhmambetovnıñ zenaat statusından marum etti. Eñ az 16 siyasiy mabüs, şu cümleden vatandaş jurnalistleri Server Mustafayev, Ruslan Suleymanov, Amet Suleymanov ve Ukrayınağa qoltutqan faal Oleg Prıhodko uquqiy imayesiz qaldılar.
Ukrayına prezidentiniñ Qırım Muhtar Cumhuriyetindeki temsilciligi Rusiyeniñ Qırımda Ukrayına vatandaşlarını qoruğan advokatlar Lilâ Gemeci, Rustem Kâmilev ve Nazim Şeyhmambetovnıñ zenaat faaliyetini qanunsız deñiştirmek ıntıluvlarını takbih etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.