Estoniya Tış işler nazirligi memleket Rusiye vatandaşları içün oturuv izni ve talebe viza berilüvini sıñırlaycaq, dep bildirdi. Tallinn ABD diger memleketlerini de Rusiye vatandaşlarına şengen vizalarnıñ berilüvini yasaqlamağa çağırdı. Şimdi Estoniyada bunıñnen bağlı teklif azırlaylar, dep yaza«Nastoyaşçeye Vremâ» telekanalı («Amerikanıñ sesi» iştiraki ile RFE/RL şirketi tarafından quruldı).
«Rusiye vatandaşları Rusiye Federatsiyasınıñ ğarbiy sıñırından, Finlândiya, Latviya, Litvaniyadan kütleviy şekilde çıqıp, Louvre baqmağa kete, Ukrayınada ise balalar öldürile. Bu ahlâq ceetinden, şübhesiz, yañlış ola», – dep bildirdi memleketniñ Tış işler naziri Urmas Reynsalu.
Rusiye vatandaşları Rusiye Federatsiyasınıñ ğarbiy sıñırından, Finlândiya, Latviya, Litvaniyadan kütleviy şekilde çıqıp, Louvre baqmağa kete, Ukrayınada ise balalar öldürileUrmas Reynsalu
Şimdilik Rusiye vatandaşları içün viza siyasetini sertleştirüv variantlarını Finlândiya da baqa, Rusiyede ise şengen içün nevbetler tura. Bundan evel insanlar bir qaç afta devamında vesiqalarnı bermek içün bekley, serbest vaqıt qıdıra.
«Biz bir ay ögüne yazıldıq. Vesiqalar meselesinde evelden olğanından daa zor oldı. Olar üç aynıñ esap areketlerini istey. Kartta eñ az 300 biñ ruble ($4839) olmalı, – dep tarif ete qadın İspaniya viza merkeziniñ nevbetinde. «Yazıluvda problemler bar», – dep tasdıqlay şengenni almağa istegen daa bir kişi.
Litvaniya. Ukrainağa qarşı cenkni bitirmek talabınen yapılğan aktsiya. Vilnüs, 2022 senesi martnıñ 2-si
Avropa Birliginde rusiyelilerni 26 memleket kirgen şengen alanına kirmek içün vizasız qaldırmağa teklif etildi. Buña fin parlamentiniñ deputatları qoltuttı. Soñra memleketniñ baş nazir vazifelerini eda etken Aki Linden Finlândiya rusiyelilerge vizalarnı berüv siyasetini sertleştirmeli, dep bildirdi. Onıñ aytqanına köre, tatil mevsimine baqmadan, Tış işler nazirligi bu meselelerni ayrı baqmağa azır.
Çeh Cumhuriyeti, Estoniya, Latviya, Litvaniya, Romaniya ve Poloniya rusiyeliler içün sıñırlavlar endi kirsetti. Olar tek qoranta azalarına ya da bazı şartlarnen yañı viza bere ya da olğanlarnı uzata. Poloniya bütün Avropa Birliginde rusiyeliler içün viza sıñırlavlarını kirsetmege talap etti. Felemenk rusiyelilerge yañı viza berip olamay, çünki Moskva olarnıñ vekillerini memleketten sürgün etti.
Poloniyadaki Rusiye elçihanesi ögünde Rusiyeniñ Ukrayına istilâsına qarşı aktsiya. Varşava, 2022 senesi iyülniñ 17-si
Avropağa seyaat etken Rusiye Federatsiyasınıñ büyük şeerleriniñ bir çoq sakini böyle adımlarnı adaletsiz saya. «Kimse umumiy qabaatlav almamalı. Bir şey yapqan kişi qabaatlanmalı. Birini sıñırlaycaq olsalar, bir sebep olmalı ve belli şartlarda ve belli insanlarğa köre yapılmalı», – dep tüşüne olardan biri.
Kimse umumiy qabaatlav almamalı. Bir şey yapqan kişi qabaatlanmalı.
Rusiye – resmiyleştirilgen şengen vizalarınıñ sayısına köre dünya lideridir. Avropa komissiyasınıñ malümatına köre, covidden evelki 2019 senesi Rusiye vatandaşları dört milliondan çoq ariza berdi. 1,5%-dan az red cevabını aldı. Rusiyeliler Avropağa ilk evelâ raatlanmaq içün kete edi.
«Köremiz ki, bir sıra Avropa memleketi rusiyeli turistlerni alâ daa bekley ve bu memleketlerde ortaq şirketler üçünci memleketlerden shemalarnı teklif ete. Ebet, tenbi bar, Tış işler nazirligi, Rosturizm tenbileri bar, bugün Avropa memleketlerine kütleviy turizm yoq, amma ayrı-ayrı kene de keteler», – dep ayta «Turpomoşç» turizm saasındaki turistik operatorlarnıñ birleşmesi» birliginiñ müdiri Osaulenko.
Rusiye turistik operatorlarnıñ birligi FSB Sıñır hızmetiniñ malümatına esaslanıp, covidden evel 2019 senesiniñ statistikasını qıyaslamaq içün bere. 2019 senesi Rusiye Federatsiyasını turizm maqsadınen ziyaret etken ve viza alğan şengen alanınıñ onunda Almaniya, İtaliya, Frenkistan ve İspaniya bar. Umumen 912 biñ kişiden az ediler. O müddet devamında şengen içün ariza bergen rusiyelilerden dört qat az ediler.
İyülniñ 26-nda Rusiye Federatsiyasınıñ Tış işler nazirligi dost olmağan memleketlerniñ vatandaşlarına elektron viza bermeycek, dep bildirdi. Rusiye prezidentiniñ matbuat kâtibi Dmitriy Peskov ise rusiyelilerge şengen vizası berilmese, Moskva pek menfiy cevap berir ve «qarşı tedbirler alır», dep bildirdi.
MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.