Ukrayına arbiyleri Hersondaki Antoniv köprüniñ yaqınlarında Rusiye ordusınıñ bazasına darbe endirdi, dep bildirdi Herson vilâyeti arbiy memuriyetiniñ yolbaşçısı, Herson vilâyetiniñ şura deputatı Serğiy Hlan.
«Bugün Antoniv köprü yaqınlarında, daa doğrusı Dnipro özeni ve Konka köprü arasında, «Nairi» qavesine yaqın avtostantsiya bar, tam darbe oldı, dep bildireler. Anda orkalarnıñ küçlü pekitüv yapqan, pek çoq silâ yerleştirgen, arbiy bölük yerleştirgen bir meydançığı bar… köpürler arasında küçlü bir blokpost edi. Şimdilik büyük bir patlav oldı… Antoniv köprü yaqınlarında arbiy yerleşüvniñ yoq etilüvi oldı», – dep ayttı o, Ukrayına umummilliy telemarafonında.
Onıñ bildirgenine köre, şimdi o yerde qara tuman köterile.
Hlan, Ukrayına Silâlı quvetleri Rusiye Federatsiyasınıñ ordusına ait silâ yerlerine «tam areket ete».
«Soñki afta içinde Çornobayıvka, Nova Kahovka, Berislav, Çulakovka, Skadovskıy rayonında duşmannı ardı-sıra yoq etüvni kördik. Bu tam darbeler – yañı silânıñ işidir», – dedi o.
Ukrayına arbiyleri, hususan «Yug» operativ komandanlığı bu aqta şimdilik haber etmey.
«Yug» operativ komandanlığı bundan evel Ukrayına cenübinde Ukrayına ordusınıñ «belli muvafaqiyetleri» aqqında bildirdi.
Ukrayına arbiyleri Herson vilâyetindeki Rusiye komandanlıq noqtalarına, silâ anbarlarına endirgen darbeleri aqqında sıq-sıq bildirip başladı.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrayınalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.