Qırımda siyasiy taqiplerniñ qurbanları alğan ükümlerniñ umumiy müddeti 1126 yıl ve 2 ayğa arttı. Bu aqta «KrımSOS» talilcisi Yevğen Yaroşenko haber etti.
«Qırımtatar faali Azamat Eyupov terror teşkilâtınıñ faaliyetini teşkil etkeninde qabaatlanıp, 17 yılğa üküm etildi. Qırımlı siyasiy mabüslerniñ umumiy üküm müddeti 1126 yıl ve 2 ay oldı», – dep bildirdi Yaroşenko.
«KrımSOS» malümatına köre, 2022 senesi iyülniñ 19-na qadar Qırımda 139 Ukrayına vatandaşı siyasiy sebepli cinaiy taqip qurbanı ola, 127-si apiste yata.
Bu sene mayıs ayında Ukrayına prezidenti Volodımır Zelenskıy siyasiy mabüslerni ve qorantalarını qoruv qanunını imzaladı.
Rusiyeniñ büyük istilâsından evel de Ukrayına prezidenti Volodımır Zelenskıy Qırım kütleviy haber vastalarında Kreml ukrayınalı siyasiy mabüslerni, hususan qırımlılarnı Rusiye apsinden azat etüv esnasını «yavaşlata», dep bildirgen edi.
Qırımnıñ Rusiye yolbaşçısı Sergey Aksenov Qırımda siyasiy mabüs yoq, dep israr ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.