Rusiye Mudafaa nazirligi, iyülniñ 14-nde Vinnıtsâğa raketa darbesini Ukrayına Silâlı quvetleriniñ yerli Zabitler evi binasında Ukraina arbiyleri ecnebiylernen toplaşuv keçirgeni içün endirdi, dep bildirdi.
Rusiye Mudafaa nazirliginiñ vekili brifingde bildirgenine köre, raketa ücümi vaqtında binada «Ukraina ava quvetleriniñ komandanlığı ve silâ bergen ecnebiyler» bar edi.
«Olar uçaq, ücüm vastalarını Ukraina Silâlı quvetlerine berüv meselesini ve Ukraina aviatsiya parkınıñ tamir etilüvini muzakere etkenler. Darbe neticesinde toplaşuv iştirakçileri yoq etildi», – dep bildire «Zvezda» telekanalı Rusiye Federatsiyası Mudafaa nazirliginiñ beyanatı aqqında.
İyulniñ 14-nde Vinnıtsâğa yapılğan raketa ücümi neticesinde, soñki malümatqa köre, 23 insan elâk oldı, aralarında üç bala bar, er kesniñ kimligi daa belli degil. 70-ten çoq insan hastahanede buluna.
Rusiyeniñ BM daimiy temsilciliginiñ üyken mesleatçısı Yevgeniy Varganov Vinnıtsâğa kerçekleştirilgen ücümni izaatlağan Rusiye akimiyeti vekillerinden birincisi edi. O, Zabitler evinde «Ukraina Silâlı quvetleri azırlandı» dep, raketa darbesi endirildi, dep ayttı.
Turmuş evi, yanındaki tibbiy merkez, Ukrayına pravoslav kilsesiniñ (MP) kilsesi ve etrafındaki binalar zarar kördi. Yerli kütleviy haber vastalarınıñ malümatına köre, Zabitler evi arbiy obyekt olaraq degil, medeniyet merkezi olaraq qullanıla. İyülniñ 14-nde anda ukrayınalı yırcı Roxolana (kerçek adı – Roksolana Sirota) kontsert berecek edi. O, Vinnıtsâğa kerçekleştirilgen ücümde taqımınıñ iştirakçilerinden biri elâk oldı, daa bir iştirakçisi yaralandı, dep bildirdi.
İyülniñ 14-nde belli olğanına köre, Rusiye ordusı Vinnıtsâğa raketa ücümini kerçekleştirdi. Şeerniñ merkezinde bir qaç inşaat zarar kördi, Turmuş evi ögünde tahminen 25 maşina yandı. Darbe kündüz şeerde çoq insan olğanda oldı.
Ukrayına prezidenti Volodımır Zelenskıy Vinnıtsâğa kerçekleştirilgen raketa darbesini izaatlap, Rusiyeni «qatil memleket ve terrorist» dep adlandırdı.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrayınalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.