Keçken künü Rusiye ordusı eñ az 10 Ukraina şeerine raketa darbelerini endirdi. Bu aqta Ukraina Silâlı quvetleri Baş ştabınıñ Baş operativ idaresiniñ yolbaşçı muavini Oleksiy Ğromov bildirdi.
Onıñ aytqanına köre, keçken künü Soledar, Bahmut, Kramatorsk, Bahmutske, Ustınivka, Pokrovsk, Liman, Slavyansk, Zaporojjâ, Krıvıy Riğ ve digerleri raketa darbelerine oğradı, Liman, Severodonetsk, Avdiyıvkağa avadan darbe endirildi.
Ukraina Silâlı quvetleriniñ Baş ştab vekili, soñki yedi kün içinde Rusiye Ukrainağa 63 raketa darbesini ve 41 aviatsiya darbesini endirdi, dep qayd etti.
«Mayısnıñ 16-nda saba 6-ğa qadar mayısnıñ 19-ndan başlap Rusiye Federatsiyasınıñ Silâlı quvetleri umumen 63 raketa darbesini ve 41 aviatsiya darbesini endirdi. Duşmannıñ esas maqsadları naqliyat infrastruktura, demiryol obyektleri oldı», – dep ayttı brifingde Ğromov.
Rusiye fevralniñ 24-nde Ukrainağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrainadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrainanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrainanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.