Rusiyeniñ Ekstremizm ile küreş merkeziniñ hadimleri Ruslan Şambazov ve Konstantin Urazov Aqmescitte advokat Edem Semedlâyevni tuttı. Bu aqta «Qırım birdemligi» advokatnıñ ömür arqadaşı Elvinanıñ haberine esaslanıp bildire.
«Onı Aqmescitniñ Lermontov soqağında tuttılar. Edem onı içtimaiy ağlarda paylaşqanları içün yaqalaylar, dep haber etti. Ekstremizm ile küreş merkeziniñ hadimleri onı maşinağa mindirdi ve olar ketkenler», – dep tarif etti Elvina Semedlâyeva.
Başqa tafsilâtlar şimdilik yoq. Rusiye uquq qoruyıcıları Elvina Semedlâyevanıñ malümatını açıq şekilde izaatlamadı.
2021 senesi advokat Edem Semedlâyev Ekstremizm ile küreş merkeziniñ bölük yolbaşçısı Ruslan Şambazovnıñ talabına riayet etmeyip, ses qaydını toqtatmağanı ve ekstremist tatuları barmı-yoqmı teşkermek içün urbasını çıqarmaq talabına razı olmağanı içün Aqmescitteki Rusiye mahkemesi tarafından Rusiye Federatsiyasınıñ Memuriy bozuvlar kodeksiniñ 19.3 maddesine istinaden 12 künge apiske alındı ve 4 biñ ruble para cezasını aldı.
ABD OSCE missiyası Qırımdaki mustaqil advokatlarğa qarşı taqip siyasetini toqtatmağa çağırdı. Semedlâyevniñ apiske alınuvı Büyük Britaniya Ukraina elçihanesi ve Çeh Cumhuriyetiniñ elçihanesi takbih ettiler. Ukraina Tış işler nazirligi Edem Semedlâyevniñ apiske alınğanını «iş aqlarınıñ bozuluvı» ve «basqı» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.