Keriçteki Privokzalnaya meydanında qırımtatarlarnıñ sovetler rejimi tarafından sürgün etilüviniñ 78 yılı munasebetinen matem mitingi ötkerildi. Bu aqta Qırım.Aqiqatqa yerli sakinler bildirdi.
Keriç, 2022 senesi mayısnıñ 18-i
Miting saat 10:00-da başlandı, yarım saat devam etti. Resmiy qapanıştan soñ sakinler genotsid qurbanları abidesine çeçekler alıp ketti, dua etti.
Keriç, 2022 senesi mayısnıñ 18-i
Şeerniñ Rusiye akimiyeti Qırımtatar halqı genotsidiniñ qurbanlarını añma kününe miting keçirilüvi aqqında haber etmedi.
Çarşenbe künü, mayısnıñ 18-nde, qırımtatarlarnıñ sovetler rejimi tarafından Qırımdan sürgün etilüviniñ 78 yılı ola. Bu künde Ukraina ve dünyada qırımtatar halqı genotsidiniñ qurbanları añıla.
Ukraina Yuqarı Radasınıñ qararına köre, mayısnıñ 18-i qırımtatar halqı genotsidiniñ qurbanlarını añma künü ilân etildi.
Mayısnıñ 18-nde Ukrainada qırımtatar halqınıñ Qırımdan sürgün etilüviniñ qurbanlarını añma maqsadınen matem tedbirleri keçirile, lâkin bu yıl kütleviy tedbirlerniñ keçirilüvine Rusiye başlatqan cenk tesir etti.
Qırımtatar Milliy Meclisiniñ reisi Refat Çubarov Rusiye işğal etken Qırımda añma tedbirleriniñ ötkerilüvinen bağlı tevsiyelerni aydınlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.