Ukraina Tış işleri nazirligi ilhaq etlgen Qırımda rusiyeli telükesizlik hadimleri “Qırım birdemligi”niñ faali Osman Belâlovnıñ evinde ötkergen tintüvini taqbih etti.
“Qırım MC yapılğan nevbetteki tintüvlerni taqbih etemiz. İşğalciler qırımtatar halqınıñ iradesini sındırmağa tırışa. Bu halqara uquqnıñ qaba şekilde bozulğanı sayıla”, – dep yazaTIN matbuat kâtibi Maryana Betsa Twitterde.
Висловлюємо протест РФ щодо триваючих порушень прав кримських татар в окупованому Криму.Росія грубо порушує норми права, наказ Міжн суду ООН
— Mariana Betsa (@Mariana_Betsa) 4 сентября 2018 г.
Ukraina TİN “Rusiye halqara uquq normalarını ve BMT Halqara mahkemesi buyruğını qaba şekilde bozğanını” qayd etti.
Sentâbrniñ 13-nde saba rusiyeli telükesizlik hadimleri Bağçasarayda “Qırım birdemligi”niñ faali Osman Belâlovnıñ evinde tintüv ötkerdi.
Tintüv yapılğan maalde Osman Belâlov evde yoq eken. O, Aqmescitke ketken, lâkin baracaq yerine barıp yetalmağan. Faaller al-azırda onen bağlanıp olamağanları aqqında ayta.
Osman Belâlov Bağçasaraydaki “Hizb ut-Tahrir davası”nıñ iştirakçisi Memet Belâlovnıñ qardaşı ola.
Qırım.Aqiqat olıp keçkenlerniñ inceliklerini ögrenmege tırışa.
Malümat derc etilgen maaldegece rusiyeli telükesizlik hızmetleri tintüv boyunca iç bir bir izaat bermedi.
2016 senesi Qırımnıñ rusiyeli mahkemesi Osman Belâlovqa 10 biñ ruble para cezası tayin etken edi. O, 2016 senesi mayısnıñ 12-nde Bağçasaraydaki “Salaçıq” kafesi yanında “ruhsetsiz mitingte” iştirak etüvde qabaatlanğan edi. O künü faaller rusiyeli telükesizlik hadimleri qırımtatarlarda tintüv yapqanını eşitip, kafe yanında toplanğan ediler.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqası olğanında şeklengen musulmanlarnıñ evlerinde sıq-sıq tintüvler keçirip başladı.