Ukrain uquqorçalav organları Qırım ükümetiniñ al-azırdaki yolbaşçısı Sergey Aksönovnıñ cinayetleri boyunca malümat toplağan edi, dep ayttı Qırım.Aqiqat Radiosı yayınında Qırımda Ukraina İİN Baş idaresiniñ sabıq yolbaşçısı Mıkola Palamarçuk.
Onıñ fikrine köre, Aksönovnıñ cevapkârlıqqa çekilmemesi, uquqqorçalav organlarınıñ yetersiz çalışqanını köstermekte.
«Aksönovnen uquqorçalav organları oğraşa edi, çünki o cinayetler işlegeninde qabaatlana edi. Ancaq materiallar mahkemege yollanmadı – onı cinaiy cevapkârlıqqa çekecek deliller yoq edi. Belki bu – uquqqorçalav organlarınıñ yetersiz çalışqanını köstermektedir. Organlarnıñ elinde olğan malümat, sadece, Aksönov qanun bozğanını köstere edi», – dep qayd etti Palamarçuk.
Bu aqta tafsilâtlıca Qırım.Aqiqatnıñ «Aksönovqa qarşı kompromat: Qırımnıñ rusiyeli yolbaşçısı keçmiş içün nasıl mahkemeleşe» adlı materialında oquñız.
Rusiye tarafından tayin Qırım yolbaşçısı Sergey Aksönov Aqmescitli bloger İlya Bolşedvorovnı mahkemege berdi. Buña blogerniñ Facebookta Qırım ükümetiniñ yolbaşçısınıñ keçmişte işlegen cinayetlerine ima etkeni sebep oldı.
Aksönov bloger paylâşqan malümatnı yalan olğanını tanımağa, onı silmesine mecbur etmege, red yazmasına ve maneviy zarar içün 1 million ruble tölemesini talap ete. Davacı paralarnıñ Aqmescit babalar evine yollanılmasını rica ete.