BMTniñ çekiştirüvlerge qarşı küreş komiteti iyülniñ 25-nde Rusiyedeki vaziyetni közden keçire. Komitet oturışuvınen bağlı malümat BMT saytında derc etildi.
«Qırım uquimaye gruppası» haber etkenine köre, Rusiye temsilcileri de Rusiye ilhaq etken Qırımda yapılğan repressiya ve çekiştirüvlernen bağlı suallerge cevap bere bileler.
Ukrain uquqimayecileri BMT komitetine 2014-2018 seneleri Rusiye Qırımda qullanğan çekiştirüvleri aqqında maruzasını teslim etti.
Uquqimayeciler haber etkenine köre, maruzada Rusiye Qırımnı ilhaq etken devir içinde qullanğan çekiştirüvnen bağlı malümat taqdim etilmekte. Bu malümat hususan, dava iştirakçileri olğan Oleg Sentsov ve Oleksandr Kolçenko, «ukrain diversantlarınıñ işi», Avromeydan faallerine nisbeten qullanılğan çekiştirüvler aqqında.
Maruzada zorbalıqnen hırsızlanğan Qırım sakinleri, mahsus hızmetlernen işbirligi yapmağa zorlavlar, Aqmescit SİZOsında mabüslerge nisbeten ğayrı insaniy davranışlarnen bağlı faktlar toplanğan dep qayd ete uquqimayeciler.
Çekiştirüvlerge qarşı küreş BMT komitetiniñ oturışuvı iyülniñ 25-26 arasında ötkerilecek.
Daa evel Büyük Britaniya tış işleri nazirligi Rusiyeden ilhaqnen razı olmağan Qırım sakinlerini taqip etüvni bitirmege çağırdı. Bu aqta TİN nazirliginiñ er yıl dünyada insan aqları boyunca azırlağan maruzasında söz yürsetile.