Yaltalı «Hizb ut-Tahrir işi»niñ iştirakçisi, Muslim Aliyevniñ evinde tintüv keçirgende küç idaresiniñ hadimleri bayağı qanun bozmalarını yaptı, olar şikâyetlerde tafsilâtlıca beyan etilecek. Qırım adliyecisi Lilâ Gemeci bunı Qırım.Aqıqat Radiosınıñ efirinde haber etti.
O hatırlattı ki, FSB hadimleri Muslimniñ qızı - Gülsüm Aliyevanıñ cep telefonını qıdıra edi. Qız Rusiye CK-niñ 282-nci maddesine (milletlerara zıddiyet çıqaruv) köre qabaatlana.
“Bozmalar sadece adliyeciniñ kirmesi yasaqlanğanında degil, aynı zamanda, qanuniy qararğa köre, evniñ baqılması şeklinde operativ-qıdırıcı areketler keçirilecek. Yani, körülme teftiş, amma Aliyevlerniñ evinde olıp keçkeni – teftiş degil, bu tintüvğa da oşamay, bu - olarnıñ şahsiy ayatına deşetli istilâ”, - dep belgiledi uquqçı.
"Aliyevlerniñ evinde olıp keçkeni – teftiş degil, bu tintüvğa da oşamay, bu - olarnıñ şahsiy ayatına deşetli istilâ”, - dep belgiledi uquqçı.
Ayrıca Gemeci, bu tintüvde şaatlar açıq-aydın olmağanını işaret etti.
“Şaat olaraq adlandırılğan insanlar, aile azalarınıñ şahsiy teşkerüvini yapmağa tırıştı. Naciye Aliyeva buña ihtar etkende, olar küç idaresiniñ hadimleri dep cevap berdiler. Çoq sayıda qanun bozmaları oldı, amma olarnıñ bütüni FSB hadimleriniñ areketlerinen bağlı şikâyetlerde beyan etilecek”, - dedi Gemeci.
İyülniñ 19-nda saba, Rusiye telükesizlik organlarınıñ hadimleri Yaltalı «Hizb ut-Tahrir işi»niñ iştirakçisi Muslim Aliyevniñ evinde «tahqiqat tedbirler» keçirgeni aqqında haber etilgen edi. Daa soñra belli olğanına köre, onıñ üyken qızı Gülsüm Aliyevağa protokol tizildi. O, Rusiye CK (milletlerara zıddiyet çıqaruv) 282-nci maddesine köre qabaatlana.
«Qırım birdemligi» birleşmesi Yaltalı «Hizb ut-Tahrir işi» iştirakçisiniñ qızı Gülsüm Aliyevanıñ evinde ötkerilgen tintüvni onıñ faalligi içün yapılğan tazyıq dep tanıy. Bu aqta birleşmeniñ beyanatında söz yürsetilmekte.
Bu iş boyunca qabaatlanğan Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk 2016 senesiniñ fevral-aprel aylarında Yaltada tutlğan ediler. Olar Rusiyede yasaq etilgen «Hizb ut-Tahrir» siyasiy İslâm teşkilâtına alâqadar olğanlarında qabaatlana.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqası olğanında şeklengen musulmanlarnıñ evlerinde sıq-sıq tintüvler keçirip başladı.
Qırım ükümeti yarımadada insanlarnıñ fikir serbestliginen bağlı aqları bozulğanını inkâr ete.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.