Qırımnıñ Yediquyu rayonında belli olmağan şahıslar Bagerovo qasabasında yerleşken musulman mezarlığında 15 danege yaqın baştaşnı yıqtırğan. Qırım.Aqiqatqa qırımtatar faali Nariman Celâl haber etkenine köre, bu vaqia aqqında iyülniñ 17-nde belli olğan.
Celâl yarımadada musulman obyektlerine qarşı yapılğan vandalizmniñ ilk misali olmağanını, lâkin Qırımda yerli politsiya hadimleri vandalizm areketlerini taqiq etkeni aqqında eşitmegenlerini qayd etti.
«Beñzer areketler soñki yıllar devamında pahıllanacaq derecede sıq yapılıp kelmekte. Bizler iç bir kere bile telükesizlik organları netice berecek bir taqiqat yapqanların qayd etmegen edik. Böyle bir munasebet telükesizlik orhganları beñzer vaqialarnı taqiq etmege istemegenleri boyunca şube doğura. Bugün bizler vertual terrorist ve ekstremistlerni deste-deste yaqalaymız, faqat kerçek vandallarnı tutup olamaymız», – dep haber etti Qırım.Aqiqatqa Nariman Celâl.
Qırımtatar faali Qırımda yerleşken musulman obyektlerine nisbeten yapılğan beñzer vandalizm areketleri, - yerli eali arasında yapılğan propaganda neticesidir degen fikirni ifade etti.
«Bizler devamlı Qırımda er şey yolunda, milletlerara vaziyet mükemmel dep eşitemiz. Ancaq yapılğan bir sıra vandalizm areketleri ve farqlı milletler arasında yayılğanpropaganda ve nefret doğuruv areketleri fonında Qırımda bazı insanlar: baştaşlarnı yıqmaq, cami divarlarında deşet yazılar yazmaq, camilerni yaqmaq ve anda hırsılıq yapmaq kibi beñzer areketlerni normal dep saya. Şunı qayd etmelidir ki, hristian mezarlıqları ve hristian ibadethanelerinde beñzer vaqialar yüz bergeni aqqında eşitmeymiz – işte bu da, insannı belli bir fikirge itey», – dep yükünledi Nariman Celâl.
Bu maalgece Yediquyu rayonı memuriyeti ile telükesizlik organlarınıñ Bagerovo qasabasında yerleşken musulman mezarlığında yüz bergen vandalizm areketlerinen alâqalı iç bir izaatı yoq.
Daa evel iyünniñ 18-den 19-na keçken gecesi Qarasuvbazarda belli olmağan şahıslar cami divarı üzerine natsist timsalleri sızğanı aqqında haber etilgen edi. 2018 senesi fevral ayında ise, Aqmescitniñ «Strelkovaya» qasabasında vandallar cami mülkiyetine zarar yetkizgen ediler.