Qırımnıñ Rusiyege tabi ükümeti «Mishor», «Dülber» ve «Ay-Petri» sanatoriyleriniñ aktsiyalarını bir buçuq milliard rublege sattı. Olar Koreizde buluna ve yarımada Rusiye tarafından ilhaq etilgen soñ «milliyleştirildiler». İyül 3-te, nasıldır «İnfrastruktura leyhalarınıñ idare etici şirketi» sıñırlı mesüliyetli cemiyetiniñ üç sanatoriy içün 24 million dollar töleycegi belli oldı. Şirket ilhaqtan soñ eki Rusiye vatandaşı tarafından meydanğa ketirildi ve Aqmescitte resmen qayd etildi. Olardan biri – general-polkovnik Vladimir Zaritskiy.
Jurnalist tahqiqatları merkeziniñ baş muarriri Valentina Samar, rusiyeli arbiyniñ nasıl etip Qırım iş adamı olğanını añlata.
Zaritskiy – general-iş adamı ola, demek mümkün. Onıñ adına resmen qayd etilgen 6 şirket bar. Ekisi endi ilhaqtan soñ Qırımda meydanğa ketirildiValentina Samar
– Zaritskiy Rusiyede eñ ziyade Raketa orduları ve artilleriyanıñ sabıq komandanı olaraq belli. Professional askerlikten çıqqan soñ cemiyet faaliyetinen oğraşa. Aynı şu ordularınıñ Veteranlar birleşmesi başında tura edi. Şimdi o, ondan ğayrı, diger strukturağa – MEGAPİR Milliy birleşmesine kirgen zabitler fondunıñ prezidenti ola. Anda qurucılıq şirketleri, Moskvada bulunğan türlü ticaret merkezleri bar. Zaritskiy – general-iş adamı ola, demek mümkün. Onıñ adına resmen qayd etilgen 6 şirket ve daa onıñ tarafından tesis etilgen bir sıra uquqiy şahıslar bar. Esas olğanlardan dört şirket Moskvada buluna ve ekisi endi ilhaqtan soñ Qırımda meydanğa ketirildi.
Valentina Samar, Zaritskiyniñ «İntegral» şirketi, 2016 senesinde Aqyarnıñ Rusiyege tabi gubernatorı Dmitriy Ovsânnikov ile «Belbek» ava limanınıñ tsivil qısmınıñ qurulması aqqında memorandum imzalağan soñ jurnalistlerniñ diqqatını çekti, dep añlata. Jurnalist tahqiqatları merkeziniñ baş muarriri, yerli jurnalistler de, qayd etilüv malümatlarında kösterilgen adreslerni ziyaret etip, bu şirketniñ, içinde ofisler olmağan adiy bir mesken evinde yerleşkenini tayin ettiler, dep qayd ete.
– Şirket «Belbek» ava limanınıñ qurucılığına milliardlarca dollarnı nasıl yatıracaq, belli degil, çünki onda yalıñız 10 biñ nizamname sermiyası bar. Büyük ihtimal ile olar, Federal maqsatlı programma boyunca kelecek büyük paralarğa işana ediler. Lâkin bir şeyler ters ketti ve neticede añlaşma Rusiye Mudafaa nazirliginen bağlı olğan şirket ile imzalandı. Zaritskiyniñ ekinci strukturası – «İnfrastruktura leyhalarınıñ idare etici şirketi» sıñırlı mesüliyetli cemiyeti – beş yıldızlı otel kompleksiniñ qurulması içün Gasprada Qarılğaç yuvası yanında büyük bir topraq parçasını aldı. Lâkin şimdilik o, bir şey qurmadı. Öyle bir versiya bar ki, onıñ şirketleri araqatlar olıp, olar vastasınen diger şahıslar obyektlerniñ saipleri olacaq. Rusiye jurnalistleri, olarnıñ artında Rotenbergler ağa-qardaş tura, dep sayalar.
Valentina Samar
QMC Prokuraturasınıñ bölük rehberi Vitaliy Sekretar, halqara uquq noqtai-nazarından Qırım sanatoriyleri ile ayın-oyunlarnıñ sadece iqtisadiy cinayetler olmağanlarını saymaq mümkün, dep iddia ete.
Bu cinayetler cezalanmayıp qalmamalı, olarnı em devlet, em de halqara seviyede tahqiq etmek kerekVitaliy Sekretar
– Halqara cinayet mahkemesi tarafından qullanılğan Roma statutınıñ sekizindi maddesi, içine em devlet, em de kooperativ ve er angi diger saiplik şekline ait digerlerniñ büyük kölemdeki mal-mülküne el qoyulmasını arbiy cinayetler sırasına kirsete. Bu cinayetler cezalanmayıp qalmamalı, olarnı em devlet, em de halqara seviyede tahqiq etmek kerek. Biz tamam bu işnen oğraşamız. Bütün mal-mülkke el qoyuv adiseleri bir cinaiy işniñ tahqiq etilmesine birleştirildi, ve bütün yañı vaqialar oña kirsetile. Şimdi anda endi 4 biñden ziyade Ukraina işhaneleri kirsetildi. Keçken yılnıñ oktâbr 6-sından itibaren biz Halqara cinayet mahkemesi prokurorınıñ ofisine bu adiseler boyunca tahqiqatnı başlamaq ricasınen arzual yolladıq. Dekabrde bu malümat onıñ tarafından azırlıq tahqiqat aqqında esabatta endi qullanılğan edi.
Regional inkişaf boyunca mutehassıs, Qırım Muhtar Cumhuriyeti Kurortlar ve turizm nazirliginiñ sabıq idare rehberi İgor Kobelâ satılğan sanatoriylerniñ kerçek fiyatını bildire.
«Mishor», «Dülber» ve «Ay-Petri» tipindeki sanatoriyler – bu, pek tatlı tilimlerdir. Anda nasıldır bonuslar dağıtılması yapılaİgor Kobelâ
– Biz bir vaqıtları sanatoriylerniñ fiyatını tayin ettik. 200-300 yataq yeri olğan orta bir sanatoriy – bu, 7-8-10 million dollar. Qırım Ukrainağa kirgende anda kruiz laynerleri kire, halqara opertorlar çalışa edi. «Mishor», «Dülber» ve «Ay-Petri» tipindeki sanatoriyler ise – bu, parkları, landşaftları, plâjları, pek çoq yataq yerleri ve mimarisi olğan pek tatlı tilimlerdir. O vaqıtlarda olarnıñ fiyatı, er biri içün eñ azından qararnen 20 million dollar edi. Bu, medeniy ceetten qıymetleri köz ögüne alınmağanda. Şimdi üçüne birlikte 24 million dollar olaraq fiyat kesildi. Bu, külünçlidir, bu, yatırım degil. Anda, daa 2015 senesinde başlanğan nasıldır bonuslar dağıtılması yapıla. O, çabik yapılmadı, çünki er şeyniñ nasıl inkişaf etecegi belli degil edi. Şimdi ise, belki de, kimdir devlet ceryanlarını sanatoriylerniñ toldurılmasına doğrulta bilecegine ümüt besley.
(Metinni Vladislav Lentsev azırladı)