İyünniñ 23-nde Eski Qırımda olğan yol qazasında qırımtatar faali Server Karametov ve qırımtatar Enver Arabaciyev zarar kördiler. Bu aqta Facebookta qırımlı faaller haber bermekte.
Olarnıñ malümatına köre, al-azırda bu insanlar sağ alda sınıqlar sebebinden hastahanede bulunmaqtalar.
Qırımdaki Rusiye MÇS ve Rusiye İİN saytlarında şimdilik bu hususnen bağlı iç bir malümat yoq.
Qırımtatar faali Server Karametov 2017 senesi avgustnıñ 8-nde Aqmescitte qırımtatarlarnıñ liderlerinden biri olğan Ahtem Çiygozğa qol tutmaq maqsadınen keçirilgen bir kişilik piket sebebinden tutulğan edi.Oña qarşı eki dane memuriy protokol tüzüldi. Biri – «bir kişilik piket keçirüv qaideleri bozğanı», ekincisi – «politsiya hadimlerine qarşılıq köstergeni» içün edi.
Daa soñra Kreml nezareti altındaki Aqmescitniñ Demiryol rayon mahkemesi «politsiya hadimlerine qarşılıq köstergeni» içün Karametovğa 10 künlük memuriy tevqif cezası bergen edi.