Qırımtatar Milliy Meclisi Rusiyeniñ kontorli altında olğan yarımadanıñ ukümeti ile emekdaşlıq yapmaqtan vazgeçken soñ milletlerara munasebetlerni idare etüv manivelâları Moskvağa sadıq olğan siyasetçilerge berildi. Rusiyege böyle etip hizmet etkenleri, olarğa karyera ve maliyede muvafaqiyetler ketirdi. Rusiyeniñ kün tertibi boyunca çalışqanlar endi taşınılmaz mal ve topraqqa saip oldılar.
2014 senesinden başlap, Kremlniñ kontroli altında olğan Sergey Aksönovnıñ ukümetinde milletlerara saanı baş nazir muavini Ruslan Balbek (2016 senesine qadar) ve Devlet milletlerara komitetiniñ başlığı Zaur Smirnov eda ettiler. (Smirnovnıñ Qırım akimiyetindeki karyerası soñuna yetti. Keçken sene o, vazifesinden istifa etti).
Qırım parlamentinde ise Remzi İlyasov bu meseleler boyunca mesüliyetli olaraq tayin etildi. Olar yarımadada qırımtatarlarnıñ kütleviy surette taqip etilgenlerini inkâr ete ve halq birligi tedbirlerini milliy bayramlar ve saylav kampaniyalarda iştirak etip numayış eteler. Rusiye ukümetiniñ vekilleri daa soñra bu argumentlerni halqara saada yayınlay ediler.
Smirnov ve İlyasov Qırımtatar Milliy Meclisiniñ sabıq azaları. Qırımtatar halqınıñ temsiliy organında, Rusiyege hizmet etkenleri içün olar «qırımtatar halqı içinde sıradan çıqarılmaq kerek», dep sayalar. Aynı zamanda hizmet etüv yılları Qırım memurlarına bayağı büyük maddiy faydalar ketirdi.
Ev, topraq, «Leksus»
Kremlge tabi Qırım parlamentinde artıq birinci yıl hizmet etkende Remzi İlyasov «Şkoda»nı «Audi A6»ğa deñiştirdi
Olardan eñ muvafaqiyetlisi, dep, Remzi İlyasov aqqında demek mümkün. 2014 senesinde onıñ mülkiyetinde yalıñız eki avtomobil qayd etilgen edi: VAZ-2109 ve «Şkoda Oktaviya A5». O, deklaratsiyasında ne topraq, ne de taşınılmaz mal kötstere edi.
Daa bir avtomobil – VAZ-21063 ömür arqadaşına ait edi. İlyasovlar eki közlü kvartiranı qullana edi, lâkin onıñ saibi degil ediler.
Remzi İlyasov Rusiyege tabi Qırım parlamentinde vitse-spiker vazifesine kirgen soñ ailesiniñ maddiy vaziyeti bayağı eyileşti.
Remzi İlyasov
Kremlge tabi Qırım parlamentinde artıq birinci yıl hizmet etkende Remzi İlyasov «Şkoda»nı «Audi A6»ğa (Rusiyeniñ bazarında fiyatı 400 biñ rubleden (168 biñ hrivnadan) başlay) ve Rusiyede fiyatı 3 million rubleden (1,25 million hrivnadan) başlağan «Leksus RX 350»ge deñiştirdi.
Aileniñ qullanıluvında meydanlığı 114,5 kv. metr olğan ev de peyda oldı. 2016 senesinde İlyasov bu evniñ saibi oldı.
Ondan ğayrı, deklaratsiyasında umumiy meydanlığı 15 biñ kv. metr olğan üç topraq arsası peyda oldı. Bıltır ise Qırım vitse-spikeri 646 kvadrat metr meydanlığında dörtünci topraq arsasını satın aldı.
Biz bu topraqnıñ qayda olğanını ve onı nasıl etip o qadar tez resmiyleştire bilgenini bilmege tırıştıq, lâkin biz telefon etkende Remzi İlyasov onı almadı.
Aynı zamanda 2016 senesinde onıñ ömür arqadaşı da 75,8 kv. metr meydanlığında kvartiranıñ saibesi oldı.
Eskiden toplanğan parağa kvartira
Zaur Smirnovnıñ Rusiyeniñ kontroli altında olğan Qırım ukümetindeki karyerası kelirli oldı. 2014 senesinde o, iç bir mal-mülkke saip olmadan, Devlet milletlerara komitetiniñ başlığı vazifesine tayin etildi. Onıñ ömür arqadaşı o vaqıt ev (250 kv. metr) ve topraq arsasınıñ (350 kv. metr) saibesi edi.
Zaur Smirnov
Qırım ukümetinde ekinci yıl çalışqanda Smirnovlarda eki közlü kvartira peyda oldı. Zaur Smirnov maliye vesiqasında, onı Qırımnıñ Rusiye tarafından ilhaqından evel toplağan ve em de kreditke alğan paralarğa ala bilgenini añlattı.
Qırım ukümetinde ekinci yıl çalışqanda Smirnovlarda eki közlü kvartira peyda oldı
Biz Zaur Smirnovdan kvartiranıñ bulunğan yeri ve onıñ alınması içün paralarnı nasıl toplamaq mümkün olğanı aqqında tafsilâtlar alamadıq. Özümizni tanıtqan soñ o, telefonnı birden taşladı ve ondan soñ telefon etkenimizde, onı almay edi. Smirnovnıñ ömür arqadaşı 2016 senesinden başlap «Mitsubişi Padjero» avtomobilini qullana.
Millionlar ile deputat
2016 senesine qadar Qırımda Aksönovnıñ ukümetinde milletlerara saanıñ kuratorı olğan Rusiye Devlet Dumasınıñ deputatı Ruslan Balbek de Rusiye ukümetine yapqan hizmette muvafaqiyetler qazandı. Yarımadada milletlerara saağa kuratorlıq yapqanda o, yılda qararnen 1 million ruble (420 biñ hrivna) qazana edi.
2015 senesinde qomşu Rusiyeniñ Devlet Dumasında saylanğan soñ Balbekniñ aylığı bayağı arttı
Neşir etilgen kelirler ve mal-mülkü aqqındaki malümatqa köre, 2014 senesinde Balbekte öz taşınılmaz malı yoq edi, lâkin o, kvartira (100 kv. metr), ev (86 kv. metr) ve topraq arsasını (1,7 biñ kv. metr) qullana edi..
Ruslan Balbek
2015 senesinde qomşu Rusiyeniñ Devlet Dumasında saylanğan soñ Balbekniñ aylığı bayağı arttı. Keçken sene o, deklaratsiyada 4,5 million ruble (1,9 million hrivna) kösterdi. Ve şimdi Balbekler qorantası 120 ve 308 kv. metrlıq eki ev ile 800 ve 950 kv. metrlıq topraq arsalarını qullana, lâkin eskiden olğanı kibi, olarnıñ saipleri degiller. Bu taşınılmaz mülkniñ saibi kim olğanını biz tayin etalmadıq, çünki material azırlanğanda, Ruslan Balbek, tıpqı Remzi İlyasov gibi, telefon etkenimizde telefon almadı.
Ondan ğayrı Balbekke Moskvada qullanuv içün meydanlığı 85 kv. metr olğan kvartira berildi. Deputatlıq vazifesinde bulunğanına qadar kirasını Rusiye bergi ödeyicileri töley.