Ukraina prezidenti Petro Poroşenko qırımtatar halqınıñ sürgün qurbanlarını añma Kününde, Ukraina «sovet rejiminiñ bütün bir halqqa, insanlıqqa qarşı yapqan utanmazca cinayetini iç bir zaman unutmaz» dep ayttı.
«Bugün bütün dünya, totalitar rejim daiyleriniñ emri üzerine qırımtatarlar ve olarnen birlikte diger milletlerni Sovetler Birliginiñ uzaq regionlarına zorbalıqnen sürgün etilgen 1944 senesiniñ deşetli vaqialarını hatırlay. Qırımtatar halqınıñ ağrısı – bizim ıumumiy ağrımız sayıla. Tuvğan Qırımına ömürlik avdet etip olamaycaq on biñlerce qırımtatarlarnıñ ağrısı», – dep yaza Poroşenko.
O, ayrıca «zemaneviy cinayetçiler Qırım yarımadasını işğal etkeni içün cezalanır ve Ukrainağa bağlı Qırım bir daa üriyetke qavuşır» dep eminlik bildirdi.
Ukraina ükümetiniñ yolbaşçısı Vladimir Groysman Twitterde, sürgün «qırımtatarlar içün felâketli neticeler ketirgenini» qayd ete.
Депортація мала катастрофічні наслідки для кримських татар. Тільки замисліться, життя 191 тисячі людей зруйнувала жорстока радянська система. Пам’ятаємо трагедію кримсько-татарського народу. pic.twitter.com/JYrld3vnLS
— Volodymyr Groysman (@VGroysman) 18 мая 2018 г.
Qırımdan qırımtatar halqı sürgüniniñ qurbanlarını añma künü er yıl mayısnıñ 18-nde qayd etile. O künü yarımadadan Orta Asiyağa qırımtatarlarnıñ ilk eşelonı yollana. Epsi olıp 200 biñden ziyade insan sürgün etilgen.