Qırımda ürmet etilgen advokat Nikolay Polozov içtimaiy ağda, Resul Velilâyevniñ yaqalanmasına cemiyetniñ diqqatını çekmek istemegenini hata dep sayğanını yazdı.
Advokat: «Lefortovo – FSBniñ şahsiy apishanesi. Andan kimse azat etilmey. Qırımda açılğan iş – RF Cinaiy kodeksi, madde 238, qısım 2, punkt «a» – bir manaçıq edi. Endiden soñ er şey daa sert ve bundan beter olacaq», – dep yazdı.
Polozov Qırımda boşuna ürmet qazanmadı. O, özüni yüksek seviyeli mustaqil zenaat saibi olaraq kösterdi. Qırımdaki vaziyet aqqında o, pek yahşı, vastasız surette bile. Bu sebepten onıñ sözlerine ciddiy munasebet köstermek kerek. Amma Resulniñ, yaqalanmasına cemiyetniñ diqqatını çekmemek qararı kerçekten de hata edimi? Belki de, iş adamınıñ cemiyet tarafından qarşılıq kösterilmesiniñ istemegeni, añlaşma yapmaq istegi ile bağlı degil de, sadece yaqalanğan künü çıqa bilecek cemiyet içindeki qarışıqlıqlarnıñ bir çoq qorantalar içün nasıl havflı neticelerge ketirmek mümkün olğanını bilgeni ile bağlıdır.
Qarasuvbazarda Resul Velilâyevniñ işhaneleri ve aqrabalarınıñ evlerindeki tintüvler ve yaqalanuvlar ile keçken mahsus operatsiyanıñ şaatları, telükesizlik hadimleriniñ rıqma-rıq tolu «Kamaz»lar ile kelgenlerini aytalar. Yani olar, itibarlı iş adamına qol tutmağa azır olğan insanlarğa qarşılıq köstermege azır edi. Bunı añlamaq mümkün, çünki Velilâyevniñ yalıñız Qarasuvbazardaki işhanelerinde biñge yaqın kişi çalışa. Buña qorantalarınıñ azaları, sadece pervasız olmağan faaliyetçiler, diger şeerlerden kele bilecek insanlar qoşulmaq mümkün edi. Umumen çatışmalar bayağı büyük mıqyaslı olmaq mümkün edi.
Neticede büyük miqdarda yaqalanğan ve, ihtimal ki, saqatlanğan insanlar olacaq edi. Telükesizlik hadimlerinde ise pek sert areket etmek içün sebep peyda olacaq edi. Refat Çubarov tarafından «qara cumaaqşamı» denilgen bu kün, Qırımda qırımtatar halqına qarşı daa büyük repressiyalarnıñ başlanğıç noqtası olacaq edi.
Elbette, halqara teşkilâtlar ve diplomatik missiyalarnıñ muracaatları olsa, bunıñ büyük bir aks-sada olacaq edi. Lâkin bütün bu şeylerni çatışmalar olmadan da yapmaq mümkün. Bunıñ içün telükesizlik hadimleri ile kütleviy çatışmalarğa ihtiyac yoq. Belli iş adamınıñ tevqif etilüv vaqiasınıñ özü cemiyette aks-sada doğurmaq kerek, ve bu artıq oldı!
O, oña yardımğa kelmege azır olğan insanlarnı qurtarmaq içün özüni feda etti
Resul Velilâyev ayatında büyük muvafaqiyetlerge boşuna irişmedi. O, büyük bir kollektivniñ rehberi olaraq, öz areketleri ve er bir qararınıñ neticelerini tahmin etmege bile. O, yardım istep ateşin bir davet ete bilir edi – ve biñlerce insan çapa-çapa oña yardımğa kelir edi. Amma o, bunıñ ne ile yekünlene bilecegini añladı. Telükesizlik hadimleri keri çekilmez edi – demek ki, barışıqlı qırımtatar muqavemetiniñ doktrinası ale daa izin bermegen şey – qannıñ tökülmesi olacaq edi. Resul, ikmetli rehber olaraq, başına kelgen belânıñ yüzlerce aileler içün de belâ olması içün yol beremedi. Belli bir manada o, özüni unutıp oña yardımğa kelmege azır olğan insanlarnı qurtarmaq içün özüni feda etti.
Cemiyet içindeki aks-sada ise artıq quvetleşe. İtibarlı Qırım iş adamı ve hayriyecisiniñ imayesine ciddiy insanlar, devlet ve halqara muessiseler celp etile. Onıñ işi aqqında yüksek seviyede laqırdı etile. İşte, cemiyet içinde kerek olğan aks-sada tamam budır. Tecavuzkâr öz tecavuzkârane usullarnı qullansın, dünya toplulığı ve qırımtatar halqı ise medeniy usullarnı qullanalar. Neticede ise mutlaqa olar yeñecek!
Zarema Seitablayeva, Qırım sakini, bloger (telükesizlik maqsadı ile muellifniñ adı ve soyadı deñiştirildi)
«Bloglar» rubrikasında ifade etilgen fikirler muelliflerniñ öz noqtai-nazarlarını aks etip, muarririyetniñ noqtai-nazarını aks etmeleri şart degil