Amerika Qoşma Ştatları, daa evel «Kreml cedveli» olaraq bilingen cedvelge kirsetilgen, Kremlge yaqın olğan Rusiye iş adamları ve memurlarına qarşı sanktsiyalar tatbiq ettiler. Munasip vesiqa AQŞ maliye nazirliginiñ saytında derc etildi.
Sanktsiyalar, cümleden, Oleg Deripaska, İgor Rotenberg, Kirill Şamalov, Viktor Vekselberg ve Suleyman Kerimovğa qarşı tatbiq etildi.
Ondan ğayrı içki işler naziri Vladimir Kolokoltsev, Rusiye gvardiyasınıñ rehberi Viktor Zolotov, Roskomnadzornıñ rehberi Aleksandr Jarov, VTB rehberi Andrey Kostin ve Tula vilâyetiniñ valisi Aleksey Dümin sanktsiyalarğa oğradılar.
AQŞ maliye naziri Stiv Mnuçinniñ beyanatında: «Rusiye ukümeti bütün dünyada zarar ketirici areketler ve şu cümleden devam etken Qırımnıñ işğali, Ukrainanıñ şarqında zorbalıqnı qozğatuv, öz vatandaşlarını bombalağan esnada Asadnıñ rejimine silâ berüv, ğarp demokratiyalarını yıqmaq teşebbüsleri, yaman niyetli kiberfaaliyet yaptı. Bu korruptsiyalı elitadan fayda körgen Rusiye oligarhları ve elitaları bundan soñ ukümetleriniñ stabilsizlik doğurğan faaliyetinden çette turmazlar», – denile.
Sanktsiyalar, keçken sene Kongress tarafından qabul etilgen Amerika duşmanlarına qarşılıq kösterüv qanunına muvafıq olaraq tatbiq etildi.
AQŞ Maliye nazirligi, olar sanktsiyalar cedveline tüşken şahıslarğa ait aktivlerniñ tevqif etilmesini ve Amerika vatandaşları ile teşkilâtlarına olarnen emekdaşlıq yapmaqnıñ yasaq etilmesini közde tutalar, dep qayd etti.
Your browser doesn’t support HTML5
Как возможные санкции США и Британии могут сократить пенсии и выплаты российским бюджетникам – объясняет экономист
AQŞ Maliye nazirliginiñ saytında derc etilgen vesiqada sanktsiyalarğa oğrağan iş adamları ve memurlarnıñ soyadları ingliz elifbesiniñ tertibi boyunca kösterileler.
1. Andrey Akimov, Rusiye «Gazprombank»ı idaresiniñ reisi.
2. Vladimir Bogdanov, «Surgutneftegaz»nıñ baş mudiri ve saiplerinden biri.
3. Zengin iş adamı Oleg Deripaska, Rusiyedeki Forbs cedvelinde bu yılnıñ 23-nci nomera. Deripaska, Rusiye ukümetiniñ yüksek maqamlı memurından doğrudan ya da vastalı şekilde alınğan avale boyunca yapqan areketleri ve Rusiye iqtisadiyatınıñ energetik saasında çalışqanı içün cedvelge tüşti. Ondan ğayrı o, onda Rusiye diplomatik pasportı olğanını itiraf etti, ve başqa devletlerde Rusiye ukümetini temsil etkenini iddia ete edi. Deripaskağa qarşı paralarnıñ yuvulması boyunca tahqiqat yapıldı. O, raqiplerni qorquzğanı, ukümet memurlarını qanunsız diñlegeni, aqsız yerde para talap etkeni ve rekette qabaatlanğan edi. Ondan ğayrı, onı memurlarnı satın alğanında, iş adamınıñ öldürilmesini sımarlağanında, Rusiyedeki teşkil olunğan cinaiy gruppirovka ile alâqalı olğanında qabaatlay ediler.
4. Aleksey Dümin, Tula vilâyetiniñ valisi. Bundan evel o, Qırımnıñ Rusiye tarafından ilhaq etilgeninde esas rolni oynağan Rusiyeniñ mahsus operatsiyalar quvetleriniñ rehberi edi.
5. Mihail Fradkov, 2004-2007 senelerinde Rusiyeniñ baş naziri, ondan soñ Rusiye Tış keşifi hizmetiniñ mudiri, al-azırda Rusiye strategik tetqiqatları institutınıñ mudiri.
6. Sergey Fursenko, Rusiye futbol birliginiñ sabıq prezidenti, «Zenit» FKniñ prezidenti.
7. Oleg Govorun, Rusiye prezidentiniñ SNG devletleri, Abhaziya ve Cenübiy Osetiya ile içtimaiy-iqtisadiy emekdaşlıq boyunca idaresiniñ rehberi. Sabıq Rusiye bölgeler inkişafı naziri.
8. Suleyman Kerimov, Federatsiya Şurasınıñ Dağıstandan azası, al-azırda Fransada, yerini terk etmeme mecburiyetini imzalağan alda buluna – onı paalı taşınılmaz mal-mülk ile bergi ayın-oyunları yapqanında qabaatlaylar.
9. Vladimir Kolokoltsev, Rusiye içki işler naziri.
10. Konstantin Kosaçev, Federatsiya Şurasınıñ halqara işler boyunca komitetiniñ reisi.
11. Andrey Kostin, Rusiye VTB bankı idaresiniñ prezident-reisi.
12. İtaliya ve Venesuela vatandaşı Leon Martines. (Oña qarşı tatbiq etilgen sanktsiyalarnıñ, ihtimal ile Rusiyege alâqası yoq).
13. Aleksey Miller, «Gazprom» idaresiniñ reisi ve mudirler şurası reisiniñ muavini.
14. Nikolay Patruşev, Rusiye Telükesizlik şurasınıñ reisi, sabıq FSB mudiri.
15. Meksika vatandaşı Peres Alvear. (Oña qarşı tatbiq etilgen sanktsiyalarnıñ, ihtimal ile Rusiyege alâqası yoq).
16. Vladislav Reznik, Devlet Dumasınıñ deputatı, «Rus» sigorta cemiyetiniñ sabıq idare reisi. 2018 senesiniñ fevralinde İspaniya prokuraturası onıñ içün beş buçuq yıl azatlıqtan marum etüv cezasını istedi. Ondan ğayrı, İspaniyada paralarnı yuvma aqqında iş boyunca Reznikniñ apayı Diana Gindin keçe. Timesnıñ malümatına köre, Reznik sıqı surette bağlı emiş olğan «tambovskaya» («malışevskaya») teşkil olunğan cinaiy gruppirovkanıñ azaları İspaniyada şahsen Putin içün taşınılmaz mülkni satın alacaq ediler.
17. İgor Rotenberg, Putinniñ dostı Arkadiy Rotenbergniñ oğlu. İgor Rotenberg, 2014 senesiniñ martında sanktsiyalarğa oğratılğan babası Arkadiy Rotenbergden bayağı miqdarda aktivler aldı. Şu cümleden, Arkadiy Rotenberg İgor Rotenbergge «Gazprom bureniye» şirketiniñ 79%-ni sattı. İgor Rotenbergniñ emcesi Boris Rotenberg şirketniñ 16%-iniñ saibi ola. Boris Rotenberg, tıpqı ağası kibi, sanktsion cedvellerge 2014 senesiniñ martında kirsetilgen edi.
18. Kirill Şamalov, Putinniñ dostu Nikolay Şamalovnıñ oğlu ve, Putin tarafından tasdiqlanmağan malümatqa köre, Putinniñ kiçik qızı dep añılğan Katerina Tihonovanıñ sabıq aqayı. Evlenüvden soñ Şamalovnıñ barlığı bayağı eyileşti: 18 ay devamında o, Rusiyeniñ «Sibur» neft ve qaz çıqarıcı şirketi aktsiyalarınıñ esas qısmını satın aldı. Bir yıl soñra o, sanktsiyalarğa oğratılğan Gazprombank devlet bankından milliard dollardan ziyade kredit alıp oldı. Aynı şu yılda Putinniñ çoq yıllıq arqadaşı, özü de sanktsiyalarğa oğratılğan Gennadiy Timçenko Şamalovğa «Sibur»nıñ qoşumça 17%-ni sattı.
19. Yevgeniy Şkolov, Rusiye prezidentiniñ yardımcısı, prezidentniñ devlet hizmeti ve kadrlar meselesi boyunca idaresiniñ faaliyetini nezaret ete. Rusiye istihbarat hadiminiñ oğlu, sabıq içki işler naziriniñ muavini.
20. Andrey Skoç, «Birleşken Rusiye»den Devlet Dumasınıñ deputatı, Alişer Usmanovnıñ iş ortağı.
21. Aleksandr Troşin, Rusiye Bankı reisiniñ muavini. Bloombergniñ malümatına köre, «taganskaya» teşkil olunğan cinaiy gruppirovkanıñ lideri Aleksandr Romanov ile sıqı bağlı.
22. Vladimir Ustinov, Rusiye prezidentiniñ Cenübiy Federal okrugunda temsilcisi. Rusiyeniñ sabıq Baş prokurorı (2000-2006) ve adliye naziri (2006-2008).
23. Timur Valiulin, Rusiye İİNiniñ Ekstremizmge qarşılıq kösterüv boyunca baş idaresiniñ rehberi.
24. Viktor Vekselberg, «Skolkovo» fondunıñ prezidenti, «Renova» şirketler gruppası mudirler şurasınıñ reisi, Rusiyedeki Forbs cedveliniñ 10-ncı yeri.
25. Aleksandr Jarov, Rusiyeniñ Alâqa, inormatsion tehnologiyalar ve kütleviy kommunikatsiyalar saasında nezaret boyunca federal hizmetiniñ (Roskomnadzor) başlığı.
26. Viktor Zolotov, Rusiye gvardiyasınıñ başlığı.
Ondan ğayrı, sanktsiyalarğa şu şirketler oğradı:
1. Agroholding Kuban (Oleg Deripaskanıñ «Bazovıy element» gruppasına kire).
2. «Bazovıy element» (Oleg Deripaska ile bağlı).
3. Vircin adalarında resmen qayd etilgen B-Finance Ltd şirketi (o da Oleg Deripaska ile bağlı).
4. EN + Group Plc (o da Oleg Deripaska ile bağlı).
5. Meksikanıñ Gallistica Diamante şirketi (sanktsiyalarnıñ tatbiq etilmesi Rusiye ile bağlı degil).
6. "Gruppa GAZ" (o da Deripaska).
7. OOO "Gazprom bureniye" (İgor Rotenberg ile bağlı).
8. OAO "YevroSibEnergo" (Oleg Deripaska).
9. "Ladoga Menecment" (Kirill Şamalov ile bağlı).
10. AO "Enpivi İnjiniring" (İgor Rotenberg ile bağlı).
11. Viktor Vekselbergniñ "Renova"sı.
12. "Rosoboroneksport" (Rosteh ile bağlı).
13. "Kommersant"nıñ malümatına köre, AQŞnıñ sanktsiyalarını beklerken Rusiye mudafaa-sanayı kompleksine hizmet berüv boyunca ihtisaslaştırılğan bank olaraq tayin etilgen «Rossiyskaya finansovaya korporatsiya».
14. "Russkiye maşinı" korporatsiyası (Oleg Deripaskanıñ «Bazovıy element»i ile bağlı).
15. Oleg Deripaskanıñ "Rusal"ı.