«Aqmescit» avalimanınıñ yañı terminalında namaz qılınacaq oda ve abdesthane azırlanmaqta. Bu aqta Qırım ve Aqyar musulmanları diniy idaresiniñ (QAMDİ) matbuat hızmeti haber etmekte.
QADMİ temsilcileri mahsus odalarnı közden keçirip, Qıblanıñ yönelişini tayin etti.
«Ondan da ğayrı, taraflar ibadethaniñ qadın ve erkeklerge ayırılacaq qısımlarını, mebel, ayaqyolnen abdestahaneniñ donatıluvı ve terminal zalındaki oq işaretleri yerleştirüv meselelerini muzakere ettiler», – dep haber ete matbuat hızmeti.
2017 senesi dekabr ayınıñ soñunda qurucılar Aqmescit avalimanınıñ yañı terminal binasınıñ qurulışını bitirip, bütün konstruktsiyalarnı bir konturğa qurağan ediler.
2016 senesi «Aqmescit» Halqara avalimanı» şirketinin qurucılıq boyunca müdiri Dmitriy Çernenkov, 2018 senesi yañı avalimanı çalışmağa başlağan soñ, al-azırdaki kompleks territoriyasında merkeziy avtovaokzal qurulması mümkün olacağı aqqında haber etken edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.