Fevralniñ 21-nde Avropa birliginiñ elçileri, Ukraina suverenitetine telüke teşkil etken Rusiyege qarşı kirsetilgen sanktsiyalarnı daa yarım yılğa uzatmağa qarar berdi, dep haber ete Brüsselden Azatlıq Radiosınıñ muhbiri.
«AB elçileri, Ukrainanıñ topraq bütünligine qarşı yapqan areketleri içün mesuliyetli sayılğan 150 şahıs ve 38 teşkilâtqa qarşı, esaplarınıñ blok etilüvi ve viza sıñırlavlarını daa altı ayğa uzatmağa qara berdi», – dep yaza Twitterde Azatlıq Radiosınıñ muhbiri Rikard Jozwiak.
EU ambassadors have today decided to prolong by 6 months the asset freezes and visa bans on 150 individuals & 38 entities responsible for actions against the territorial integrity of #Ukraine. #Russia #Crimea
— Rikard Jozwiak (@RikardJozwiak) 21 февраля 2018 г.
Soñki sefer AB Şurası Ukraina suverenitetine telüke teşkil etken Rusiyege qarşı kirsetilgen sanktsiyalarını 2017 senesi sentâbrniñ 14-nde 2018 senesi martnıñ 15-ne qadar uzatqan edi.
Sıñırlav tedbirleri arasında viza sıñırlavları ve bank esaplarınıñ blok etilmesi de kire. Şuranıñ saytındaki beyanatta, Ukrainadaki vaziyet ögrenilüvi neticesinde «sanktsion rejim deñişme ketirmegenine» işaret etile. Brüseel o zaman öldürilgen dört şahısnı sanktsiyalar cedvelinden silgen edi.
Sıñırlav tedbirleri 2014 senesi mart ayında Avropa birliginiñ Ukrainadaki buhranğa bir reaktsiyası olaraq kirsetilgen edi.
Ondan da ğayrı Rusiye ve ilhaq etilgen Qırımdaki bazı vatandaşlar ile şirketlerge, Donbass ve Qırım separatistleri ve Ukraina ükümetiniñ sabıq yolbaşçılarınen, Rusiye iqtisadiyatınıñ belli-başlı bazı saalarına qarşı ayrıca devam etken bir qaç paket sanktsiyalar kirsetilgen edi.
ABD ve «Yediler gruppası»na kirgen diger devletlernen beraber daa bazı memleketler de sanktsiyalar kirsetken edi.