Ukraina tış işleri nazirligi, Şimaliy-Kavkaz okrugınıñ arbiy mahkemesi baqqanı Ukrainanıñ altı vatandaşı Muslim Aliyev, Emir-Üsein Kuku, Vadim Siruk, Enver Bekirov, Refat Alimov ve Arsen Cepparov iştirak etken Yaltalı «Hizb ut-Tahrir işi»ni içün «qatiy narazılıq» bidirdi.
«Rusiye tarafından teşkil etilgen mahkeme saçmalığı – tecavuzcı devlet tarafından «terrorizmge qarşı küreş» şiarı altında qırımtatarlarına yapılğan represiyalarnıñ nebvbetteki misalidir. Ukraina MİDi Rusiyeden qırımtatar halqınıñ siyasiy ceetten taqip etilüvini acele sürette toqtatmasını talap ete», – denilmekte nazirlikniñ beyanatında.
Ukrain tış siyaset nazirligi halqara cemaatçılıqtan ayrıca «Rusiye ve vaqtınca işğal etilgen Qırım Muhtar Cumhuriyeti territoriyasında qanunsız tutulğan Ukraina vatandaşlarını azat etmek maqsadınen, Rusiye mahkeme organlarınıñ insanlıqqa qarşı ve adaletsiz faaliyetlerini mahküm etüv ve tecavuzcı devletke siyasiy ve diplomatik basqını arttırmasına» çağırdı.
2016 senesi fevral-mart ayları arasında Yaltada Arsen Cepparov ve Refat Alimov, Emir-Üsein Kuku, Muslim Aliyev, Enver Bekirov ve Vadim Siruk tutulıp alınğan edi. Olar Rusiyede yasaqlanğan «Hizb ut-Tahrir» islâm siyasiy teşkilâtına alâqası olğanındsa qabaatlana.
Daa evel Rusiye arbiy mahkemesi Yaltalı «Hizb ut-Tahrir işi» mahkemelerini Aqmescitte köçme oturışuvda keçire edi. Ondan soñ tevqif etilgen qırımlılar Rostov-na-Donu şeerine yollanıldı.
Yanvarniñ 24-nde Ukraina tış işleri Nazirligi Rusiyeden Yaltalı «Hizb ut-Tahrir işi»niñ altı figurantını azat etmesini talap etken edi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.