Ukraina lıja (kayak) canbazı Aleksandr Abramenko Ukraina fristaylınıñ tarihında birinci olimpik mükâfat qazandı. Bu altın medal Ukraina içün Phençhandaki Olimpik oyunlarında birinci oldı. Ukrainalı sportçu özüniñ pyedestaldaki yerini öz ustazı – bu sport çeşitini Ukrainada taqdim etken şimdilik yekâne qırımtatar ile «dögip» azırlağan edi.
Ukrainalı olimpiada çempionınıñ treneri Enver Ablayev Özbekistanda doğdı. Karyerasını sportçı gimnast olaraq yedi yaşında başlağan edi. Daa soñra o, professional ayatını qış sport çeşitine bağışladı. Öyle oldı ki, Enver öz treneri ile beraber sportiv gimnastikadan fristaylğa keçti ve artıq 16 yaşında qorantasınen beraber Ukrainağa kelip çıqtı.
Çempionnıñ treneri: «Biz bütün taqımımıznen beraber Ukrainağa köçtik. Mında men başta sportçu ve şimdi endi trener olaraq çalışmağa devam ettim. Bizim esas bazamız Zakarpatyede edi. Bizni bir kereden anda yolladılar. Ve öyle olıp çıqtı ki, men şimdilik kene de anda qalam», – dep köçkenini hatırlay.
Aleksandr Abramenko ve Enver Ablayev
Ablayev Ukraina bayrağı altında İtaliyada Madonna-di-Kamilyo şeerçiginde ötkerilgen Fristayl boyunca dünya kubogınıñ ğalibi oldı (2005 senesi). Ondan soñ taliyi halqara sınıf sport ustasını trenerlik karyerasına ketirdi. Tecribeli sportçu Phençhanğa Ukrainanıñ fristayl boyunca qoşma taqımınıñ treneri sıfatında keldi.
Anam şimdi Qırımda, men ise anda 2014 senesinden berli olmadımEnver Ablayev
Ablayev, Olimpik oyunlarda Ukraina sportçularınıñ fristayl boyunca yolunı hatırlap: «Biz bu medalge doğru çoq vaqıt kettik. Bir çoq Olimpik oyunda fristayl boyunca bu mukâfatqa yaqın edik: 1998 senesi Naganoda dörtünci oldıq, Solt-Leyk-Sitide beşinci yerni qazandıq, Turinde 11-nci edik, Soçide altıncı yer aldıq, lâkin pyedestalğa iç bir türlü yaqınlaşıp olamadıq. Şimdi ise öyle bir oldı ki, em medal bizimki, em de birden altın oldı», – dey.
Aleksandr Abramenko
Şimdiki çempionnıñ treneri Facebooktaki saifesinde, «tam manada böyle olmasa da ve bu şeerge sıq-sıq barmaq nasip olmasa da» özü Aqyardan olğanını qayd etti.
Trener: «Aqrabalarım Aqyarda yaşay. Men de, kelip-ketüv ve köçüvler ile, anda çoq vaqıt bulundım. Anam şimdi Qırımda, men ise anda 2014 senesinden berli olmadım. Evelden bütün yazğa bara edim. Şimdi ise yazda er vaqıt meşğul olam. Lâkin aprelde Qırımğa barmağa ümüt etem», – deye paylaşa.
O, halqara sport yarışlarında qırımtatar halqını pek az sportçu temsil ete, dep qayd ete.
«Men, menim sport çeşitimde şu anda qırımtatar halqınıñ yekâne temsilcisi olam. Şimdi Kazahstanda Eldar adlı bir yaş yigit peyda oldı. Olar sportçunı yetiştireler», – dey Enver.
Pyedestalda er kes er zaman resimge çıqa, bu yüz yıllarnen devam eteEner Ablayev
İçtimaiy ağlarnıñ qullanıcıları bugün sportçularnıñ areketlerini, milletini ve siyasetnen bağlı noqtalarnı diqqatsız qaldırmaylar. Aleksandr Abramenko şu yerde azırlıqsız yapılğan çeçek merasiminde mavılı-sarılı bayraqnı rusiyeli olimpik atletiniñ omuzına taşladı. Bu annıñ fotoresimi, internette yayılıp, Ukrainada tenqit dalğasını köterdi. Trener ise sportçunıñ areketinde yaman bir şey körmey.
Ablayev: «Pyedestalda er kes er zaman resimge çıqa, bu yüz yıllarnen devam ete. Añlaşıla, şimdi bazılar bunı qozğatıp zevq aladırlar, lâkin mence bu, aqılsızlıqtır», – dep saya.
Sportçularnı ekseriyeti ananelerge ve – sıq-sıq – alâmetlerge emiyet bereler. Fristaylcılar içün de eyi alâmetlerge inanuv yabancı degil. Enver endi eki yıldan berli yarışlarğa barğanda yanına hususiy bir tılsım – kürekni alıp bara.
Enver endi eki yıldan berli yarışlarğa barğanda yanına hususiy bir tılsım – kürekni alıp bara
Ukraina çempionınıñ treneri: «Er bir trenerniñ çalışqan, emek bergende qullanğan öz küregi bar. Men, Mukaçevodaki ustalarımızğa özümkini Ukraina bayrağınıñ tüslerine boyalamağa rica ettim. Ve işte o, eki yıldan berli menimnen beraber seahat ete. Demek ki, bu menim tılsımımdır», – dep paylaşa.
Alâmetlerge inanuv şimdiki Olimpik oyunlarnda da artqaç olmasa da, trenerniñ aytqanına köre, eyecanlanuv yalıñız birinci künlerde müim edi. Finişke yaqınlaşqanda ise Ukrainanıñ yeñecegine eminlik doğdı.