Kreml nezareti altındaki Qırım Yuqarı mahkemesi Bağçasaraylı «Hizb ut-tahrir işi» figurantları olğan Zevri Abseitov, Remzi Memetov, Rustem Abiltarov ve Enver Mamutovnıñ apiste qaluv müddetlweriniñ uzatıluvını baqmaqta.
«Qırım birdemligi» cemaat birleşmesi haber etkenine köre, mahkeme binası ögünde semetdeşlerine qol tutmaq içün kelgen qırımlılar toplaşqan.
2016 senesi mayıs 12-ndeBağçasarayda rusiye küç idaresiniñ hadimleri bir qaç qırımtatar musulmanıñ evinde ve yerli qavehanede tintüv keçirdi. Neticede Bağçasaraynıñ dört sakini -Zevri Abseitov, Remzi Memetov, Rustem Abiltarov ve Enver Mamutov tutulıp alındı. Olar Rusiyede terroristik teşkilât dep tanılğan«Hizb ut-Tahrir» teşkilâtınen bağlı olğanında qabaatlandı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Rusiye işğalinden soñ, Qırımda mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.