Ukraina, Moskvada tevqif etilgen ukrain jurmalisti Roman Suşçenkonı rusiyeli askerlerge deñiştirmege azır, dep beyan etti Ukraina prezidenti Petro Poroşenko, fevralniñ 12-nde derc etilgen avstriyalı Profil neşirine bergen intervyusında.
«Bizler Rusiyede tutulıp alınğan bizim ukrainlerni qaytarıp almağa isteymiz. Bizler, menim devletime qatil kibi öldürmege kelgen rusiyeli askerlerni Suşçenkoğa deñiştirmege azırmız. Yaqında belli rejissör Oleg Sentsovnıñ Rusiyede tutulıp alınğanına dört yıl tolacaq. Suşçenko, Sentsov, bir çoq qırımtatar – biz olarnı qaytarıp almağa isteymiz», – dep beyan etti Poroşenko.
Rusiye FSBsi 2016 senesi sentâbrniñ 20-nda Suçşenkonı Moskvada tutıp alaraq, onı ukrain istihbaratınıñ hadimi olğanında ve dersiñ, «mahsus, silâlı küçler ve Rusiye milliy gvardiyası birlikleriniñ faaliyeti aqqında devlet sırı olğan malümat toplay» dep qabaatlağan edi. Oña qarşı «casuslıq» maddesinde qabaatlağan cinaiy iş açılğan edi.
Suşçenko bütün qabaatlavlarnı inkâr ete. Ukrain tarafı jurnalistniñ qabaatlavlarını temelsiz dep saya ve onıñ acele sürette azat etilmesini talap ete.
Yanvarniñ 24-nde Rusiyeniñ Moskva şeer mahkemesi Suşçenkonıñ tevqifini 2018 senesi martnıñ 30-na qadar uzatqan edi.
Oleg Sentsov 2014 senesi mayıs ayında yarımadada terakt teşkil etüvde qabaatlanaraq Qırımda Rusiye hususiy hızmetiniñ hadimleri tarafından tutulıp alınğan edi. 2015 senesi avgust ayında Rostov-na-Donu şeerinde keçken Şimaliy-Kavkaz arbiy okrugınıñ mahkemesi Sentsovnı Qırım territoriyasında terrosistik faaliyet keçirüvde qabaatlayaraq, onı 20 yılğa şiddetli apis cezasına mahküm etken edi. O, qabaatlavlarnı tanımağan edi. «Memorial» uquqimaye merkezi Sentsovnı siyasiy mabüsler cedveline kirsetti.
Uquqimayecilerniñ malümatına köre, 60-qa yaqın Ukraina vatandaşı farqlı siyasiy sebeplerden dolayı Rusiye ve ilhaq etilgen Qırım territoriyasında apiste tutulmaqta.