Ukraina tış işleri nazirligi fevralniñ 7-nde saba qırımtatar Mustafa Kalafatovnıñ evinde tüntüv yapqan soñ alıp ketkenlerini takbih etti.
«İşğalcilerniñ niyeti Qırım Muhtar Cumhuriyetiniñ ilhaqınen razı olmağanlarnı yoq etüvden ibaret. Takbih etemiz. Bütün repressiya faktları BMT Halqara mahkemesindeki partnörlarımızğa bildirilecek», – dep yaza fevralniñ 7-nde Twittrde Ukraina MİD spikeri Maryana Betsa.
Fevralniñ 7-nde qırımtatar Mustafa Kalafatovnıñ evinde tintüv yapıldı. «Qırım birdemligi» haber etkenine köre, tintüvden soñ rusiyeli küç idaresiniñ hadimleri Kalafatovnı belli olmağan tarafqa alıp ketkenler.
Qırımdaki rusiyeli küç idareleriniñ saytlarında bu vaqia aqqında iç bir malümat yoq.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.