Ukraina MVDsi 2018 senesiniñ soñuna qadar Qırım ve Aqyar devriye politsiyasınıñ hususiy alt bölügini meydanğa ketirmege istegeni aqqında haber ete. Bu aqta Ukraina Milliy politsiyasınıñ yolbaşçısı Sergey Knyazev bergen malümatqa esaslanıp 112.ua yazmaqta.
Ondan da ğayrı, neşir yazğanına köre, politsiya alt bölükleri Kovel ve Bela Tsekvada da açılacaq eken.
Ukraina iç işleri naziri Arsen Avakovnıñ sözlerine köre, alt bölükler kelecek yıllar içün teşkil etilecek. Yani Qırım «işğal altında bulunğan devir içinde politsiya hadimleri başqa yerlerde çalışacaq».
Devre politsiya departamenti reberiniñ muavini Aleksey Beloşçitskiy qayd etkenine köre, meydanğa ketirilgen yañı alt bölükler Qırım memuriy sıñırına yaqın halqara trassalarda çalışacaq, dep yaza 112.ua.
2014 senesi Qırım Rusiye tarafından ilhaq etilgen soñ Ukraina qıta qısmınen yarımada arasında resmiy olaraq - memuriy, aslında - aqiqiy bir sıñır peyda oldı. Memuriy sıñırda «Kalançak», «Çonğar» ve «Çaplınka» olaraq üç kiriş-çıqış noqtası çalışmaqta.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.