Moskva şeeri Tverskoy rayon mahkemesi qırımtatar Milliy Meclisiniñ muavinleri Ahtem Çiygoz ve İlmi Umerov adından Rusiye prezidenti Vladimir Putinniñ memuriyetine berilgen memuriy davasını qabul etmegen. Dava imayeci tarafınıñ istegine binayen Rusiye prezidentiniñ, olarnıñ af etilüvinen bağlı fermanen alâqalı edi, dep iza etti Qırım.Aqiqatqa rusiyeli advokat Nikolay Polozov.
«Qadınıñ, Rusiye Federatsiyasınıñ prezidenti, mahkeme tarafından taqip etilüvden muaf degeni, bizim işnen alâqalı degil. Dava prezidentnen ve onıñ qabul etken normativ aktlarnen bağlı degil, dava prezidentniñ memuriyetinen alâqalı. Bu dava vesiqalarını teslim etkende, bizler mahkemeniñ prezident memuriyetine qarşı areket etip olamaycağını bile edik, çünki bunı yalıñız yüksek seviyedeki medeniyetli devletlerde yapmaq mümkün, Rusiye ise – imkânsız. Bu davanı açqanda, onı temyiz etmek zarur olacağını da añlay edik. Maqsat – Rusiye mahkemesiniñ bütün basamaqlarından keçip, Avropa insan aqları mahkemesine barıp yetmekten ibaret»,– dedi advokat.
O, Rusiye Anayasasınıñ 24 maddesine binaen, devlet ve yerli idariy organlar, anda çalışqan memurlar er keske onıñ aq ve uquqlarına tiyişli olğan vesiqa ve materiallarnen tanışmağa imkân bermek mecburiyetinde olğanlarını da ilâve etti. Buña baqmadan Kreml, Umerov ve Çiygoz azat etilmesine esas bergen vesiqalarnı köstermekni red etti.
Mütenasip davalar 2017 senesi dekabr ayınıñ soñunda teslim etilgen edi.
2017 senesi sentâbr ayında Kreml nezaretindeki Qırım Yuqarı mahkemesi Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alındı. Çiygoz kütleviy nizamsızlıqlar teşkil etmekte qabaatlanğan edi.
Ondan soñ mahkeme İlmi Umerovnı Qırımda eki yıl köy tarzındaki koloniyada qaluv cezasına mahküm etken edi. Umerov açıq menbalarda yapılğan separatizmge çağıruv yapmaqta qabaatlandı.
Rusiye akimiyeti oktâbrniñ 25-nde Umerov ve Çiygoznı azat etip, Türkiyege teslim etti. Daa soñra azat etilgen qırımtatar halqı Milliy Meclisiniñ yolbaşçıları Kyivge keldiler.