Ukraina tış işleri naziri Pavlo Klimkin, resmiy Kyiv Rusiyege Donbass ve ilhaq etilgen Qırımda «işğalci akimiyetni qanuniyleştirmege imkân bermez», dep iddia ete.
Bu aqta o, yanvarniñ 22-nde ATR telekanalınıñ efirinde beyan etti, dep haber ete Twitterde Ukraina MİDi.
«Rusiye Ukraina olmadan ayaqta qalıp olamaycaq bir imperiya qurmaqta. Ukrainler ise özlerini üriyetsiz tasavur etip olamaylar. Rusiye Donbassta öz müstemlekesini qurıp, Donbass ve Qırımda işğalci akimiyetini qanuniyleştirmek istey.Biz buña musaade etmemmiz!» – dey Klimkin.
.@PavloKlimkin на @ATR__Official: #Росія будує імперію, яка не може існувати без України. А українці не можуть себе уявити без свободи. РФ хоче встановити свою колонію на #Донбас%27і, легітимізувати свою окупаційну владу на Донбасі та в #Крим%27у. Ми цього не дозволимо! pic.twitter.com/Ytb2y3Gebl
— MFA of Ukraine 🇺🇦 (@MFA_Ukraine) 22 января 2018 г.
Onıñ sözlerine köre, Rusiyege qarşı kirsetilgen sanktsiyalar «Qırım ve Donbass azat etilgence» devam etmeli.
«Ukraina iç bir şartta keri çekilmez ve bu yönelişte bizim partnörlerımıznıñ pozitsiyası yekâne olmalı», – dep qayd etti nazir.
Daa evel Klimkin, resmiy Kyiv «cenk bitip, topraqlar keri qaytarılmağance» Qırımda qalğan arbiy tehnikanıñ keri qaltarıluvı qabul etmeycegini beyan etken edi.
2014 senesi martnıñ 16-nda Qırım ve Aqyarda yarımadanıñ statusı boyunca dünyada qabul etilmegen referendum ötkerildi. Bunıñ neticesinde Rusiye Qırımnı özüne qoşqanını ilân etti. Ukraina, Avropa birligi ve ABD bunı tanımayıp, Qırım Rusiye tarafında işğal etilgenini tasdiqladılar. Martnıñ 18-nde Rusiye prezidenti Vladimir Putin Qırımnı Rusiyege «qoşulğanı» aqqında ilân etti.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.