Rusiye tış işleri nazirliginiñ yolbaşçısı Sergey Lavrov «Qırımnıñ qaytarıluvı içün» adlı medal üzerinde oymanen 20 fevral dep yazılğanını, Ukrainadan onıñ sabıq prezidenti Viktor Yanukoviç daa qaçmağanı esapqa alınsa, «tehnikiy hatadır», dep ayta.
Bu beyanatını Sergey Lavrov yanvarniñ 15-nde keçken matbuat konferentsiyasında bildirdi, dep haber ete UNİAN.
«Men bu medalni körmegen edim, men bellesem, bu yalıñız bir tehnikiy hatadır», – dey Lavrov.
Ukrainağa ait Qırım zapt etilgen soñ, Rusiyede arbiyler, siyasetçiler ve «Qırım samooboronasınıñ» temsilcileri, operatsiya 2014 senesi fevralniñ 20-nden 2014 senesi martnıñ 18-ne qadar keçirilde, dep yazılğan «Qırımnıñ qaytarıluvı içün» adlı medalnen taqdirlenip başlandı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.