Ukraina gimni azat etilgen Qırım ve Aqyarda em de Donetsk ve Lugansk vilâyetlerinde yañğıraycaq, dep ayttı Ukraina prezidenti Petro Poroşenko yanvarniñ 15-nde, memleketniñ devlet gimni redaktirlengenine 26 yıl tolğanını izaatlar eken.
«Donetsk vilâyetiniñ Pokrovsk şeerinde balalar Ukraina gimnini bütün samimiyet ve isteknen icra etkenlerini pek yahşı hatırlayım. Böyle anlar ukrain gimni Donetsk ve Lugansk, Aqmescit ve Aqyarda illâ ki yañğıraycağına olğan inamnı qaviyleştire», – dep yaza Poroşenko özüniñ Facebook saifesinde.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.