Ukraina prezidenti Petro Poroşenko Ukrainanıñ «Terrorizmge qarşı operatsiya zonası ve Ukrainanıñ sıñır boyundaki rayonlarında yayınlamaq içün berilgen muvaqqat izinler ile alâqalı olğan bazı Ukraina qanunlarına deñişmeler kirsetüv aqqında» qanunını imzaladı. Bunı yanvarniñ 9-nda onıñ matbuat hizmeti bildire.
Qanun, «menfiy tışqı informatsion tesirlerden eñ ziyade zararlana bilecek territoriyalarda» telekösterüvlerni yayınlamaq içün muvaqqat izinlerniñ tezleştirilgen şekilde berilmesini bir tertipke qoya.
Bildirüvde: «Maqsatqa irişüv, hususiy yayınlav rejimi olğan territoriyalar: Qırım Muhtar Cumhuriyeti ve Aqyar, Donetsk ve Lugansk vilâyetleriniñ ayrı rayonları ve qomşu devletlerniñ territoriyalarından efirdeki telekösterüvler ve radioeşittirüvler vastasınen istilâcı devletniñ yayınları translâtsiya etilgen Ukrainanıñ sıñır boyundaki rayonlarında muvaqqat yayınlav içün izin berüv protsedurasınıñ qanun boyunca tatbiq etilmesi yolunen temin etilecek», – denile.
Rusiye ve onıñ ittfaqdaşları, Rusiye tarafından kontrol etilgen territoriyalar –ilhaq etilgen Qırım ve işğal etilgen Donbassnıñ bir qısmında Ukraina kütleviy haber vastalarınıñ yayınlanmasını toqtattı. Bu sebepten Ukrainanıñ kütleviy haber vastaları öz signallarını Kyivniñ kontroli altında olmağan territoriyalarğa iriştirmek içün imkânlar qıdıra.
Misal içün, Ukrainanıñ Milliy içtimaiy radio şirketi ile beraber de ilhaq etilgen Qırımda orta AM dalğalarındaki 549 kHz sıqlığında eşittirüvlerini yayınlağan Qırım.Aqiqat Radiosı, 2017 senesi sentâbrniñ 4-nden başlap, FM diapazonınıñ 105,9 MHz sıqlığında künde 24 saat içinde Qırım içün radioeşittirüvlerini translâtsiya etmege başladı. Ukrainanıñ Şarqındaki şeerlerde FM diapazonında çalışqan ve Ukrainanıñ Dünya radio hizmetiniñ orta dalğalarında (1431 kHz) radioeşittirüvlerini yayınlağan Donbass.Aqiqat Radiosı leyhası, 2016 senesi yanvarniñ 23-nden başlap, Donetsk ve Lugansk vilâyetleriniñ Ukrainanıñ kontroli altında olmağan rayonları içün yayınlarını translâtsiya ete.